މެލޭޝިއާގެ ގައުމީ އެއާލައިންގެ ދަތުރުތައް އަނެއްކާވެސް ރާއްޖެއަށް ފެށުމަށް ނިންމައިފިއެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ މެލޭޝިއާ އެއާލައިންސް އިން ފަށާ ދަތުރުތަކުގެ ފުރަތަމަ ފްލައިޓު ވެލާނާ އިންޓަނޭޝަނަލް އެއާޕޯޓަށް މިފެށޭ އޮގަސްޓު މަހު 1 ވަނަ ދުވަހު ހެނދުނު ޖެއްސުމަށް ހަމަޖެހިފައިވާ ކަމަށެވެ.
އެމްއޭސީއެލް އިން ބުނީ މި އެއާލައިންގެ ދަތުރުތައް ހަފްތާގެ 7 ދުވަހުވެސް ކުރުމަށް ހަމަޖެހިފައިވާ ކަމަށާއި، މި އެއާލައިން އިން ދިވެހިރާއްޖެއަށް ދަތުރުކުރުމަށް ބޭނުންކުރާނީ ބޮއިން 737 ޑޭޝް 8 މަރުކާގެ 174 ސީޓުގެ ފްލައިޓެއް ކަމަށެވެ.
މެލޭޝިއާގެ ކުއަލަލަމްޕޫރް އިން ވެލާނާ އިންޓަނޭޝަނަލް އެއާޕޯޓަށް ދަތުރުކުރާ ފުރަތަމަ ފްލައިޓަށް މަރުހަބާ ކިޔުމަށްޓަކައި ހާއްސަ ރަސްމިއްޔާތެއް ބޭއްވުމަށް ހަމަޖެހިފައިވާއިރު، މި ރަސްމިއްޔާތުގައި ޓޫރިޒަމް މިނިސްޓްރީ، އެމްއޭސީއެލް، އެމްއެމްޕީއާރްސީ އަދި މެލޭޝިއާ އެއާލައިންސްގެ އިސް ބޭފުޅުން ބައިވެރިވެވަޑައިގަތުމަށް ވަނީ ހަމަޖެހިފައެވެ.
މެލޭޝިއާގެ ގައުމީ އެއާލައިން، މެލޭޝިއާ އެއާލައިންސް އިން ދިވެހިރާއްޖެއަށް އެންމެ ފަހުން ދަތުރު ކޮށްފައިވަނީ 2017 ވަނަ އަހަރު އެވެ.
