ރައްޔިތުންގެ މަޖިލީހުގެ މެންބަރުންގެ އަދަދު އެއްވަރެއްގައި ހިފެހެއްޓުމަށް، ނުވަތަ އަދަދު މަދުކުރުމަށް ތާއީދުކުރާ ކަމަށާއި، އެކަމަކު އެ ނިންމުން ނިންމަން ވާނީ ފުޅާ ދާއިރާއެއްގައި މަޝްވަރާކުރެވި، ރައްޔިތުންގެ ބައިވެރިވުން އެކުލެވޭ ގޮތަށް ކަމަށް، މައި އިދިކޮޅު ޕާޓީ އެމްޑީޕީން މިއަދު ބުނެފިއެވެ.
ބާރަށު ދާއިރާގެ މެންބަރު އަދި ވެރިކަންކުރާ ޕީއެންސީގެ ނައިބު ރައީސް އިބްރާހީމް ޝުޖާއު ރައްޔިތުންގެ މަޖިލީހުގެ މެންބަރުންގެ އަދަދު އިތުރުވަމުންދާތީ މެންބަރުންގެ އަދަދު މަދުކުރުމާ ގުޅޭ ގޮތުން މެންބަރުންގެ ހިޔާލު ހޯދުމަށް ހުށަހެޅުއްވި ގަރާރު ބަލައިގަނެ، މިނިވަން މުއައްސަސާތަކާ ބެހޭ ކޮމިޓީއަށް ފޮނުވާލީ މި މަހުގެ ކުރީކޮޅެވެ. މިއަދުގެ ބައްދަލުވުމުގައި އޮތީ އެމްޑީޕީއާއި ޕީއެންސީގެ ހިޔާލު ހުރި ނެތް ގޮތް ބެލުމެވެ.
މިއަދުގެ ކޮމިޓީ ބައްދަލުވުމުގައި ގަރާރަށް ވާހަކަ ދައްކަވަމުން އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ، ރައްޔިތުންގެ މަޖިލީހުގެ މެންބަރުންގެ އަދަދު މަދުކުރަން ވާނީ ނުވަތަ އަދަދު އެއްވަރެއްގައި ހިފަހައްޓަން ވާނީ ފުޅާ ދާއިރާއެއްގައި މަޝްވަރާކުރެވި، ސިޔާސީ ޕާޓީތަކާއި މަދަނީ ޖަމިއްޔާތަކާއި އާންމުންގެ ހިޔާލާއި ލަފާގެ މަތިން ކަމަށާއި، އެފަދަ ބަދަލެއް ގެންނައިރު އާންމުންގެ ބައިވެރިވުން އޮންނަ ގޮތަށް އަދަދު އެކުލެވުން މުހިންމުކަމަށް ގަބޫލުކުރައްވާ ކަމަށެވެ.
އަނަސްގެ އިތުރުން މި ބައްދަލުވުމުގައި ބައިވެރިވެވަޑައިގެންނެވި އެމްޑީޕީގެ ލީގަލް ޑިރެކްޓަރު މަހްފޫޒު ސައީދު ވިދާޅުވީ، މެންބަރުންގެ އަދަދު އެކުލެވުން އޮންނަ މާއްދާ އިސްލާހުކުރުމުގެ ކުރިން އެ މާއްދާ ހިމެނިފައިވާ ސަބަބު ދެނެގަނެ، ވަކި ގާނޫނެއްގެ ދަށުން މެންބަރުންގެ އަދަދު ކަނޑައެޅިފައިވާ ގޮތް ބަލާލުން މުހިންމު ކަމަށެވެ.
މަހްފޫޒު ވިދާޅުވީ، މެންބަރުން އިންތިހާބުކޮށް ގާނޫނު ހަދާ ބާރަކީ ރައްޔިތުންގެ މަޖިލީހަށް ވުމުގެ ބޭނުމަކީ ގާނޫނަކީ އާންމުން ހަދާ އެއްޗަކަށް ވުން ކަމަށާއި، ގާނޫނުއަސާސީގެ 71 ވަނަ މާއްދާ އެކުލެވިގެންވަނީ ގާނޫނުތައް ހަދައި އިސްލާހުކުރެވެނީ އާންމުންގެ ބައިވެރިވުން އޮންނަ ގޮތަށް ކަން ކަށަވަރުކުރުމަށްޓަކައި ކަމަށެވެ. ނަމަވެސް އޭނާ ވިދާޅުވި ގޮތުގައި މެންބަރުންގެ އަދަދު ހިފެހެއްޓުމާ ގުޅޭ ގަރާރު ޝުޖާއު ހުށަހެޅުއްވީ، ދައުލަތުގެ މާލިއްޔަތަށް ބުރަވާތީ އެ ބުރަކަން ފިލުވާލުމުގެ ވިސްނުމުގައެވެ.
އެކަމަކު އިސްލާހު ފާސްކުރާއިރު އަސްލު މަގްސަދު ނުގެއްލޭ ގޮތަށް އިސްލާހު ފާސްކުރުން މުހިންމުކަމަށް މަހްފޫޒު ވިދާޅުވިއެވެ.
"އެއީ ކޮންމެ ރައްޔިތަކު ތަމްސީލުވެގެންވާ ގޮތް ވެގެން ދިއުން،"
އެއާއެކު އޭނާ ފާހަގަކުރެއްވީ ބޮޑެތި ބައެއް ގައުމުތަކުގައި ގާނޫނު ހަދާ މަޖިލިސް އެކުލެވިގެން އައި ގޮތެވެ. އެގޮތުން:
- އެމެރިކާގެ ސެނެޓުގައި 435 މެންބަރުން ތިބެން ޖެހޭނެ ކަމަށްވޭ
- އިނގިރޭސިވިލާތުގެ ހައުސް އޮފް ކޮމަންސްގައި 650 މެންބަރުން ތިބެން ޖެހޭނެ ކަމަށްވޭ
- އިންޑިއާގެ ލޮކްޝަބާގައި ގިނަވެގެން ތިބެންވާނީ 552 މެންބަރުން ކަމަށްވޭ
ކޮމިޓީގެ ކިބައިން މަހްފޫޒު އެދިވަޑައިގަތީ މެންބަރުންގެ އަދަދު ކަނޑައެޅުމާ މެދު މަޝްވަރާކުރެވެމުން ދާ ވަގުތު އާންމުންގެ ބައިވެރިވުން ގެއްލިގެން ނުދާނެ ފަދަ ގޮތެއް ހޯދައި އަދަދު ކަނޑައެޅުމަށެވެ. އޭނާ ވިދާޅުވީ، މިފަދައިން މަޝްވަރާކުރެވޭ ހިނދު ބައެއް ކަހަލަ ކަންކަމަށް އަލިއަޅުވާލުން މުހިންމުކަމަށެވެ.
"ރައްޔިތުން މަޖިލީހުގެ މެންބަރުން އިންތިހާބު މި ކުރަނީ އޭނަ މެދުވެރިކޮށް ގާނޫނު ހެދުމަށް ކަމަށްވާއިރު، މިއީ އެ ދާއިރާގަ ހުރި އެންމެ ނުފޫޒުގަދަ، ނުވަތަ ރައްޔިތުންގެ ތެރެއިން އެންމެ ގިނަ ބަޔަކާ އެންމެ ގުޅުން ބޮޑު މީހާއަށް ދެވޭ ފުރުސަތެއްގެ ގޮތުގަ މިހާރު ބަދަލުވެގެން ގޮސްފަ އޮތީ،" އޭނާ ވިދާޅުވިއެވެ.
"އޭގެ ބަދަލުގަ އަޅުގަނޑަށް ހީވަނީ މިކަމަށް އަޅުގަނޑުމެން މި މާއްދާ، ގާނޫނުއަސާސީގެ 71 ވަނަ މާއްދާގަ އަޅުގަނޑުމެން އަތްލާން ގަސްދުކުރާކަމަށް ވެއްޖިއްޔާ، މި ހުރިހާ ބައިތަކެއް ކަވާކުރެވޭނެ އުސޫލަކުން މެންބަރަކަށް ހުންނަ މީހާއަށް އެންމެ ނުފޫޒު ނުފޯރުވާ އޭނައަކީ އެކަމަށް އެންމެ ގާބިލު މީހާގެ ގޮތުގައި އިންތިހާބުކުރެވޭނީ ކޮން މަގަކުން ދިޔައީމަތޯ، ރައްޔިތުންގެ ރިޕްރެޒެންޓޭޝަން ނުގެއްލޭނީ ކިހިނެއް ގެންދިޔައީމަތޯ، އެއާ އެކީގަ ރައްޔިތުންގެ މަޖިލީހުގެ ޖުމްލަ އަދަދަކީ އެއީ ވަކި މީހެއްގެ ކޮންޓްރޯލަށް ގެނެވިދާނެ ވަރުގެ މަދު އަދަދަކަށް ވެސް ވެގެނެއް ނުވާނެ،"
އަނަސް ވިދާޅުވި ފަދައިން މަހްފޫޒު ވެސް ވިދާޅުވީ، ފުޅާކޮށް މަޝްވަރާކުރެވިގެން ނޫނީ މަޖިލީހުގެ މެންބަރުންގެ އަދަދު ކަނޑައެޅުން ރަނގަޅުނޫން ކަމަށެވެ. އޭނާ ވިދާޅުވީ، މެންބަރުންގެ އަދަދު ސީދާ ގާނޫނުއަސާސީގައި ހިމެނެން ޖެހޭނެ ކަމަށް ތާއީދުކުރައްވާ ކަމަށެވެ.
އެމްޑީޕީ ލީޑަރުންނަށް ޝުކުރިއްޔާ ރާއްޖޭގައިތިބެންޖެހޭނީ 75 މެމްބަރުން