ގދ. ތިނަދޫ މަގު ހެދުމުގެ މަޝްރޫއުގެ ދެވަނަ ފިޔަވަހި ނިންމާލައިފިއެވެ.
78 މިލިއަން ރުފިޔާއަށް ވުރެ ގިނަ ރުފިޔާ ހޭދަކޮށް ޒަމާނީ ފެންވަރަށް ތިނަދޫގެ މަގުތައް ހެދުމުގެ މަސައްކަތް ރޯޑް ޑިވަލޮޕްމަންޓު ކޯޕަރޭޝަން (އާރްޑީސީ)ން ފެށީ 2021 ވަނަ އަހަރުގެ މެއި މަހުއެވެ.
އަދި މި މަޝްރޫއުގެ ފުރަތަމަ ފިޔަވަހި ހުސްވި އަހަރުގެ ޖުލައި ނިންމާފައިވާއިރު އޭރުވެސް ވަނީ 11 ކިލޯމީޓަރަށް ތާރު އަޅާ ނިންމާފައެވެ. މި މަޝްރޫއުގެ ދެވަނަ ފިޔަވަހީގެ ދަށުން މިހާރު މިވަނީ 6.5 ކިލޯމީޓަރަށް ތާރު އަޅައި ނިންމާފައެވެ.
މީގެ އިތުރުންވެސް މަގުތަކުގެ ފެންވަރު ރަނގަޅުކޮށް، ފެން ބޮޑުވާ މައްސަލައަށް ދާއިމީ ހައްލެއް ގެނައުމުގެ މަސައްކަތް ވެސް އެ ކޯޕަރޭޝަނުން ވަނީ ކޮށްފައެވެ.
އަދި ހަމައެހެންމެ މަގު ބައްތި ޖެހުމާއި ކުރިން އަޑިގުޑަންކޮށް އޮތް މަގުތަކުގައި ތާރު އެޅުމުގެ އިތުރުން، ސްޕީޑް ބްރޭކަރުތަކާއި މަގުމަތީ ޓްރެފިކް ނިޝާންތައް ޖަހާ މަގުތައް ވަނީ ޒަމާނީ ފެންވަރަށް ތަރައްގީ ކޮށްފައެވެ. ދެ ވަނަ ފިޔަވަހީގެ ދަށުން ތިނަދޫގެ 14 މަގެއް ތަރައްގީކުރިއެވެ.
