ސެންޓްރަލް އޭޝިއަން ވޮލީބޯލް އެސޯސިއޭޝަންގެ އަންޑާ 20 ވިމެންސް ވޮލީބޯލް ޗެމްޕިއަންޝިޕް ނިންމުމުގެ ރަސްމިއްޔާތު ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ޝަރަފުވެރި ކޮށްދެއްވައިފިއެވެ.
ސޯޝަލް ސެންޓަރުގައި ކުރިއަށްދިޔަ މި ރަސްމިއްޔާތުގައި މެޑަމް ސާޖިދާ ވަނީ މި މުބާރާތުގެ ފައިނަލް މެޗު ބައްލަވާލައްވާފައެވެ. ސާޖިދާ ވަނީ މުބާރާތުގެ ފެއާ ޕްލޭ ޓީމް ކަމުގައިވާ ދިވެހިރާއްޖޭގެ ޓީމަށް ޝީލްޑް ހަވާލުކޮށްދެއްވައި، މުބާރާތުގެ ޗެމްޕިއަން ޓީމަށް ގޯލްޑް މެޑެލް އަދި ޓްރޮފީ ހަވާލު ކޮށްދެއްވާފައެވެ.
މި މުބާރާތުގެ ފައިނަލުގައި ބައްދަލުކޮށްފައިވަނީ ސްރީލަންކާ ޓީމާއި ކިރިގިސްތާން ޓީމެވެ. މި މުބާރާތުގައި ޖުމުލަ ހަތަރު ގައުމަކުން ވަނީ ބައިވެރިވެފައެވެ. އެއީ:
- ދިވެހިރާއްޖެ
- ސްރީލަންކާ
- ކިރިގިސްތާން
- ނޭޕާލް
މި މުބާރާތް ކާމިޔާބުކޮށްފައިވަނީ ކިރިގިސްތާން ޓީމެވެ. ޖުލައި މަހުގެ 18 ވަނަ ދުވަހުން ފެށިގެން ރޭގެ ނިޔަލަށް ކުރިއަށް ގެންދެވުނު މި މުބާރާތަކީ ވޮލީބޯލް އެސޯސިއޭޝަން އޮފް މޯލްޑިވްސްގެ ފާރާތުން އިންތިޒާމް ކޮށްގެން ކުރިއަށް ގެންގޮސްފައިވާ މުބާރާތެކެވެ.
މި މުބާރާތަކީ ވިހި އަހަރުން ދަށުގެ އަންހެން ވޮލީކުޅުންތެރިންނަށް ހާއްސަކޮށްގެން ދިވެހިރާއްޖޭގައި ބޭއްވި ފުރަތަމަ ބައިނަލްއަގުވާމީ މުބާރާތެވެ.
