ވޯލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ފަރާތުން އެކިއެކި ފަރާތްތަކުން ހޯދާފައިވާ ހިދުމަތްތަކަށް ފައިސާ ނުލިބިވާކަމުގެ ޝަކުވާ އަންނަމުންދާ ކަމަށާއި، އެފަދަ ފަރާތްތަކުން މި މައުލޫމާތު އެ އެސޯސިއޭޝަނާއި ހިއްސާކޮށްދިނުމަށް އެދިއްޖެއެވެ.
ވީއޭއެމް ބުނީ ފާއިތުވީ ދުވަސްތަކުގައި، އެކިއެކި ފަރާތްތަކުން ހޯދާފައިވާ ހިދުމަތްތަކަށް ފައިސާ ނުލިބޭކަމުގެ މައުލޫމާތު ލިބިފައިވާތީ، އެ އެސޯސިއޭޝަނުގެ ފަރާތުން ހޯދާފައިވާ ހިދުމަތްތަކަށް ފައިސާ ލިބިފައިނުވާ ފަރާތްތަކުން އެ މައުލޫމާތު ހިއްސާކޮށްދިނުމަށް އެދޭކަމަށެވެ.
އެ ގޮތުން ހިދުމަތް ހޯދުމަށް، ވޮލީބޯލް އެސޯސިއޭޝަން އޮފް މޯލްޑިވްސްއިން ފޮނުވާފައިވާ ރިކްއެސްޓްގެ ކޮޕީއާއި އެ އެސޯޝިއޭޝަނުން ހޯދި ހިދުމަތަށް ފައިސާ ހޯދުމަށް ފޮނުވާފައިވާ ބިލްގެ ކޮޕީގެ އިތުރުން ހޯދި ހިދުމަތަށް ފައިސާ ހޯދުމަށް ފޮނުވާފައިވާ ބިލް އެސޯސިއޭޝަނަށް ބަލައިގަތް ލިޔުމުގެ ކޮޕީ ނުވަތަ ފައިސާ ހޯދުމަށް ފޮނުވާފައިވާ ބިލް އެސޯސިއޭޝަނަށް ފޮނުވި އީ-މެއިލްގެ ކޮޕީއެއް ހުށަހެޅުމަށް އެދިފައެވެ. އަދި މި ލިޔެކިޔުންތައް މެއި 27، 2024 ވަނަ ދުވަހު މެންދުރު 12:00 ގެ ހުށަހެޅުމަށް އެ އެސޯސިއޭޝަނުން އެދިފައިވާއިރު މި މުއްދަތުގެ ފަހުން ހުށަހަޅާ ލިޔުންތަކާއި އީ-މެއިލްގެ ޒަރީއާއިން ފޮނުއްވާ ލިއުންތައްވެސް ބަލައިނުގަނެކަމަށް ވަނީ ބުނެފައެވެ.
މީގެ އިތުރުން އެ އެސޯސިއޭޝަނުން ވަނީ ލިއުންތަކުގެ ކޮޕީގައި، އެ ލިއުމަކީ އަސްލާ އެއްގޮތް ކޮޕީއެއްކަން ބަޔާންކޮށް، ގާނޫނީ ވަކީލެއްގެ ނަމާއި ސޮއި އަދި ތާރީހް ލިޔުމަށް އެދިފައެވެ. އަދި ހިދުމަތެއް ހޯދުމަށް ވޮލީބޯލް އެސޯސިއޭޝަނުން ފޮނުވާފައިވާ ރިކްއެސްޓްގެ ކޮޕީނެތި ހުށަހަޅުއްވާ ލިއުންތައް ބަލައިނުގަންނާނެކަމަށް އެ އެސޯސިއޭޝަނުން ވަނީ ބުނެފައެވެ.
ފާއިތިވި ދުވަސްތަކުގައި ވޯލީބޯލް އެސޯސިއޭޝަންގެ މައްސަލަތަކަށް ފެންމަތިވެފައިވާއިރު ކުޅިވަރު ގާނޫނާއި އެ އެސޯސިއޭޝަންގެ އަސާސީ ގަވާއިދާ ހިލާފަށް ވީއޭއެމްގެ ހިންގުމުންދާ މައްސަލަވެސް ވަނީ ފެންމަތިވެފައެވެ. އަދި ވީއޭއެމްގެ އެކްސްކޯގެ ހުސްވެފައިވާ މަގާމުތަކަށް މިއަހަރުގެ މާޗް މަހުގެ ތެރޭގައި ވަނީ މެންބަރުން އިންތިހާބުުކޮށްފައެވެ. އަދި ވީއޭއެމްގެ ރައީސް ކަމަށް މުހައްމަދު ލަތީފް ވަނީ އައްޔަންކޮށްފައެވެ. މީގެ ކުރިންވެސް އެ އެސޯސިއޭޝަންގެ ރައީސްކަން ކުރެއްވި ލަތީފު ވިދާޅުވީ ކުރިމަތީގައި އޮތީ ރާއްޖޭގެ ވޮލީ އަށް އެންމެ މުހިންމު އަހަރުކަމަށާއި އެއް އަހަރު މަސައްކަތްކޮށްގެން، ކުރިއަށް އޮތް ފަސް އަހަރުގައި ހާސިލު ކުރަން ބޭނުންވާ ލަނޑުދަނޑިތަކެއް ކަނޑައެޅިދާނެ ކަމަށެވެ.
