ވިލިމާލޭ ފަޅުން ނުކުތް ތެޔޮބޯޓެއްގައި ދިޔަ ކަމަށް ބުނާ މުހައްމަދު ލިޓަން މަރާލާފައިވާ ކަމަށާއި އެކަން ކުރީ އޭނާގެ އަތުގައި ހުރި ފައިސާތަކުގެ ބޭނުމުގައި ކަމަށް ދައުލަތުން ކްރިމިނަލް ކޯޓުގައި މިއަދު ބުނެފިއެވެ.
މި މައްސަލައިގައި ހައްޔަރު ކޮށްފައިވާ މުހައްމަދު ނިޒާމުގެ މައްޗަށް ލިޓަން މޫދަށް ވައްޓާލައިގެން އޭނާ މަރާލި ކަމަށް ބުނެ ދައުވާކޮށްފައިވާއިރު އޭނާގެ ހަށުގަނޑު އަދިވެސް ފެނިފައެއް ނުވެއެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ދައުވާ އިއްވަމުން ދައުލަތުގެ ވަކީލާ ވިދާޅުވީ ލިޓަން ބޯޓުގައި ހުއްޓާ ކ. ގަލުފަޅު ކިޔާ ސަރަހައްދުން އޭނާ މޫދަށް ވައްޓާލައިގެން މަރާލާފައިވާ ކަމަށާއި ނިޒާމު އެކަން ކުރީ ފައިސާގެ ބޭނުމުގައި ކަމަށެވެ. ދައުލަތުން ކޮށްފައިވާ ދައުވާއަށް ޖަވާބުދެމުން ނިޒާމުގެ ވަކީލުވަނީ ދައުވާ ސާފުވެއްޖެކަމަށާ ލިޔުންތައް ލިބުމުން ދައުވާއަށް ޖަވާބުދާރީވާނެކަމަށް ވިދާޅުވެފައެވެ.
މީގެ އިތުރުން ނިޒާމްގެ މައްޗަށް ވައްކަމުގެ ދައުވާ އާއި ޑައިމޯފިނުން މުއާމަލާތް ކުރުމުގެ ދައުވާ ދައުލަތުންކޮށްފައިވާއިރު އޭނާގެ މައްޗަށް ވައްކަމުގެ ދައުވާ ކުރަނީ ބޯޓުގައި ހުރި ލިޓަންގެ 51،000 ރުފިޔާ ވަގަށް ނެގި ކަމަށް ބުނެއެވެ. އަދި ޑައިމޯފިނުން މުއާމަލާތް ކުރުމުގެ ދައުވާ ކުރަނީ އޭނާ ދިރިއުޅު ކޮޓަރިން މަސްތުވާތަކެތި ފެނުނު ކަމަށް ބުނެ އެވެ. އެހެން ނަމަވެސް މި ދެ ދައުވާއަށްވެސް ނާޒިމު އިންކާރުކޮށްފައިވާއިރު އޭނާ ބުނީ އެ މައްސަލާގައި ފުލުހުން އޭނާ ހޯދަމުންދާ ވާހަކަ ބުނުމުން ދެ ފަހަރު ފުލުސް އޮފީހަށް ދިޔަ ކަމަށެވެ. އެކަމަކު ފުލުހުން އޭނާއާ ހަވާލުވާން ދެކޮޅު ހެދި ކަމަށާއި ފުލުހުން އޭނާ ބަންދުކުރީ ފިލައިގެން އުޅޭ ކަމަށް ބުނެ ކަމަށެވެ.
ތެޔޮ ބޯޓެއްގައި ޑިސެމްބަރު 28، 2022ގައި ދިޔަ ދެމީހަކު ގެއްލިގެން ފުލުހުންނަށް ރިޕޯޓް ކޮށްފައި ވަނިކޮށް ޖެނުއަރީ 1 ވަނަ ދުވަހު އެ ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފައެވެ. ނަމަވެސް އެ ބޯޓުގައި ލިޓަން އަދި ނިޒާމް ވެސް ނެތެވެ. އެ ދެ މީހުން ހޯދުމަށް ފުލުހުންގެ އޮޕަރޭޝަން ހުއްޓާނުލާ ކުރިއަށް ގެންދަނިކޮށް ނިޒާމް ހައްޔަރު ކޮށްފައި ވަނީ ސޯޝަލް މީޑިއާގައި އޭނާ ފެނިގެން މީހަކު ހިއްސާކުރި ފޮޓޯއަކާ ގުޅިގެންނެވެ.
