ރާއްޖޭގެ ބޯޑަރަށް ވަންނަ އުޅަނދުފަހަރު މޮނިޓާކޮށް ބެލެހެއްޓުމަށް ޗައިނާ، ޖަޕާން އަދި އެމެރިކާއިން އެހީތެރިކަން ފޯރުކޮށްދިނުމަށް ނިންމާފައި ވާކަމަށް ކޮމިޝަނާ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ 241 ކޮމިޓީގައި ވާހަކަ ދައްކަވަމުން މާނިއުވަނީ އެ ގައުމުތަކުން، ކަސްޓަމްސްއަށް ފޯރުކޮށްދިނުމަށް ނިންމާފައިވާ އެހީތަކާ، ކުރެވެމުންދާ މަޝްވަރާތަކުގެ ތަފްސީލު ދެއްވާފައެވެ. އެ ގޮތުން މާނިއު ވިދާޅުވީ ޖަޕާނު ސަރުކާރުގެ ފަރާތުން 85 ފޫޓުގެ އުޅަނދެއް ދިނުމަށް ނިންމާފައިވާ ކަަމަށެވެ. އަދި ޗައިނާ ސަރުކާރުގެ ފަރާތުން ވެސް ދެ އުޅަނދެއް ދިނުމަށް ނިންމާފައި ވާއިރު އެމެރިކާ އިން ވެސް އުޅަނދެއް ލިބޭނެ ކަމަށް މާނިއު ވިދާޅުވިއެވެ.
މީގެ އިތުރުން މާނިއު ވިދާޅުވީ ރާއްޖޭގެ ބޯޑަރަށް ވަންނަ އުޅަނދުފަހަރު މޮނިޓާ ކުރުމަށް ކަސްޓަމްސް އަށް ޑްރޯންތަކެއް ގެންނަން ނިންމާފައިވާކަމަށާ އެމެރިކާ އާއި ޗައިނާ ސަރުކާރުގެ ފަރާތުން ޑްރޯންއެއް ފޯރުކޮށްދޭ ގޮތަށް ހަމަޖެހިފައިވާކަމަށެވެ.
ރާއްޖޭގެ ބޯޑަރަށް ވަންނަ އުޅަނދުތައް އަމިއްލަ އަށް މޮނިޓާ ކުރެވޭ ވަރަށް ކަސްޓަމްސްގައި މިހާތަނަށް ވަސީލަތްތައް ގާއިމުކުރެވިފައި ނުވާކަން ފާހަގަކޮށް މާނިއު ވިދާޅުވީ ބޯޑަރަށް ވަންނަ އުޅަނދުތައް މޮނިޓާ ކުރުމުގެ މަސައްކަތް މިހާތަނަށް ވެސް ކުރީ އެމްއެންޑީއެފްގެ ކޯސްޓްގާޑުގެ އެހީތެރިކަމާ އެކު ކަމަށެވެ. ކަސްޓަމްސް އާއި އެމްއެންޑީއެފްގެ މެދުގައި އެހީތެރިކަން ބަދަލު ކުރުމަށް އެއްބަސްވުމެއް ހަދާފައިވާއިރު މާނިއު ވިދާޅުވީ ޑްރޯންތައް ގެނަޔަސް އެތަކެތި އޮޕަރޭޓް ކުރުމުގެ މަސައްކަތް ކުރާނީވެސް އެމްއެންޑީއެފްގައި އަލަށް އުފެއްދި އެއާކޯއާ ގުޅިގެން ކަމަށެވެ. އަދި މަސައްކަތް ކުރިއަށް ދާނީ ޖޮއިންޓް އޮޕަރޭޝަން ހިންގާ ގޮތަށްކަމަށް މާނިއު ވިދާޅުވިއެވެ.
