ވެލާނާ އިންޓަނޭޝަނަލް އެއާޕޯޓުގެ ހުޅަނގާ އުތުރު ފަރާތުގައި އިތުރު ދެ ޗެކް ޕޯސްޓު ގާއިމު ކޮށްފިއެެވެ.
މި ޕޯސްޓް ހުޅުވައިދެއްވީ އެމްއޭސީއެލްގެ މެނޭޖިން ޑިރެކްޓަރު އަދި ސީއީއޯ އިބުރާހިމް ޝަރީފް މުހައްމަދުއެވެ. މި ރަސްމިއްޔާތުގައި ޝަރީފް ވިދާޅުވީ މި ގާއިމު ކުރެވުނު ޗެކް ޕޯސްޓް ތަކަކީ ވަރަށް ޒަމާނީ ޗެކް ޕޯސްޓް ތަކެއް ކަމަށެވެ. އަދި މިޗެކް ޕޯސްޓްތަކުން އެއާ ސައިޑަށް އަންނަ މީހުންނާ، ވަންނަ ހުރިހާ އުޅަނދު ފަހަރު އޭވިއޭޝަން ސެކިއުރިޓީން ވަރަށް ރަނގަޅަށް ބަލާނެ ކަމަށް ޝަރީފް ވިދާޅުވިއެވެ.
މީގެ އިތުރުން ޝަރީފް ވިދާޅުވީ މި ދެ ޗެކް ޕޯސްޓާއެކު އެއާޕޯޓުގެ ސަލާމަތާ ރައްކާތެރިކަން އިތުރަށް ކަށަވަރު ވެގެންދާނެ ކަމަށެވެ. އަދި މި ދެ ޗެކް ޕޯސްޓުގެ ސަބަބުން ކަސްޓަމްސްއަށް ނުގަވާއިދުން މަސްތުވާތަކެތި އެތެރެވުމަށް ހުޅުވިފައި ހުރި ދޮރުތައް ބަންދުކުރުމަށް ފުރުސަތު ބޮޑުވާނެކަމަށް ޝަރީފް ވިދާޅުވިއެވެ. އިތުރަށް ޝަރީފް ވިދާޅުވީ އެއާ ސައިޑަށް ވަނުމަށް އެހާ ގިނަ ތަންތަން އިތުރު ކުރުމަކީ އެހާ ރަނގަޅު ކަމެއް ނޫން ކަމަށާ، އެހެނަސް އެއާ ސައިޑުގައި ކުރާ މަސައްކަތް ތަކަށް ދަތި ނުވާ ވަރަށް ތަންތަން ހުންނަން ޖެހޭކަމަށެވެ. އަދި އެއާޕޯޓްގެ ދެ ފަޅީގައި ދެ ޕޯސްޓު އެޅުމުން އެއަޕޯޓްގައި އޮތް ދަތި ވަރަށް ބޮޑަށް ލުއިވެގެންދާނެ ކަމަށް ޝަރީފް ވިދާޅުވިއެވެ.
މި ހިދުމަތްތަކާއެކު އެތެރޭގެ ސަލާމަތީ ކަންކަން ހަރުދަނާ ކުރުމަށް ސްކޭން ކުރެވޭނެ އިތުރު ނިޒާމުތައް ގާއިމުކުރެވިގެން ދިޔަކަން ފާހަގަކުރައްވަމުން ޝަރީފް ވިދާޅުވީ އެއާސައިޑުގައި ވަރަށް އަވަހަށް ލަގެޖް ބަލަހައްޓާ މެޝިނެއްވެސް ގާއިމު ކުރެވިގެން ދާނެ ކަމަށެވެ. އަދި އިތުރަށް ސްކޭން ކުރެވި، ފޮށިތައް ބަލެމުގެ މަސައްކަތް ހަރުދަނާކަމާއެކު ކުރުމުގެ ފުރުސަތު ފަހިވެގެންދާނެ ކަމަށެވެ.
