ނިމިދިޔަ އަޟްހާ އީދުގައި ބ. ކަމަދޫ އިން ނަން ވިދާލި ސަގާފީ ކުޅިވަރު ގުރޫޕުން، މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު)ގެ ރިސޯޓެއްގައި ޝޯ އެއް ދީފިއެވެ.
މި ޝޯ ބާއްވާފައި ވަނީ ކުރެއްދޫ އައިލެންޑު ރިސޯޓުގައެވެ. ސަގާފީ ނެށުމުގެ އިތުރުން އެކި ހަރަކާތްތަކާއެކު ކުރިއަށް ދިޔަ މި ޝޯގައި ކަމަދޫ ސަގާފީ ކުޅިވަރު ގުރޫޕުގަައި ހިމެނޭ އަންހެނުންނާއި ފިރިހެނުން ވަނީ ބައިވެރި ވެފައެވެ.
މިއީ އެ ރަށު ސަގާފީ ކުޅިވަރު ގުރޫޕަށް ލިބުނު ތަރުހީބު ފާހަގަ ކުރުމަށް އުއްޗުގެ ފަރާތްޕުޅުން ބޭއްވި ހާއްސަ ޝޯ އެކެވެ.
މި ޝޯގައި، މިދިޔަ ބޮޑު އީދުގައި ރާއްޖޭގެ ގިނަ ބައެއްގެ ސަމާލުކަން ހޯދި ކަމަދޫގެ ސަގާފީ ކުޅިވަރު ގުރޫޕްގެ ގިނަ ހުށަހެޅުންތަކެއް ދައްކާލާފައި ވާއިރު އެ ގުރޫޕަށް އުއްޗުގެ ފަރާތުން ހާއްސަ ހަދިޔާއެއް ވެސް ވަނީ އަރުވާފައެވެ.
އީދުގައި ކަމަދޫގެ ނަން ވިދާލާފައި ވަނީ ދަފި ނެގުމާއި، ބަނޑިޔާ ޖެހުން ފަދަ ހަރަކާތްތަކުންނެވެ. މިހަރަކާތްތަކުގެ ތެރެއިން އާންމުންގެ އެންމެ ބޮޑު ސަމާލު ކަމެއް ލިބިގެން ގޮސްފައިވަނީ ކަނބަލުންގެ ދަފި ނެގުމުގެ ހަރަކާތަށެވެ.
ކަމަދޫ އަންހެން ކުދިން ކުރެއްދޫ ރިސޯޓަށް ސީޕްލޭނުން ފައިބާ މަންޒަރާއި ރިސޯޓުން އެކުދިންނަށް މަރުހަބާ ކިޔާ ވީޑިއޯއެއްވެސް ވަނީ އާންމުވެފައެވެ.
ކަމަދޫގެ މި ގުރޫޕަށް އުއްޗުގެ ހާއްސަ ދައުވަތު ލިބިފައިވާއިރު ރާއްޖޭން ބޭރުގެ މަޝްހޫރު ފަރާތްތަކަށްވެސް އުއްޗު މިފަދަ ހާއްސަ ދައުވަތު ދެއެވެ.
