ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އެކައުންޓިން އަދި ފިނޭންސް ދާއިރާއިން ޑިރެކްޓަރުންގެ ޕޫލެއް އެކުލަވާލަން ނިންމައިފިއެވެ.
ޕީސީބީ އިން ބުނީ މި ޑިރެކްޓަރުންގެ ޕޫލު އެކުލަވާލާ މައިގަނޑު ސަބަބަކީ މުޅި ކުންފުނީގެ އިންޓާނަލް ކޮންޓްރޯލްސް އާއި ރިސްކް މެނޭޖްމެންޓު ހަރުދަނާ ކުރުމަށާއި، ކުންފުންޏަކީ މާލީ ގޮތުން ފުދުންތެރި ކުންފުންޏަކަށް ހެދުމަށް ބޭނުންވާ އިރުޝާދު ދެވޭ ފަދަ ފަންނީ ފަރާތްތަކެއް ހޯދުން ކަމަށެވެ. ޕީސީބީ އިން ބުނީ މި ބަދަލާއެކު ކުންފުނިތަކުގެ ބޯޑުގައި އެކައުންޓިން އެންޑް ފައިނެންސް ދާއިރާގެ ތަޖުރިބާހުރި އިންޓަނޭޝަނަލް ފެޑަރޭޝަން އޮފް އެކައުންޓެންޓްސް (އައިފެކް) އިން ގަބޫލުކުރާ ފެންވަރުގެ ފަންނީ ފަރާތެއް ހިމެނޭ ކަން ކަށަވަރު ކުރެވިގެން ދާނެ ކަމަށެވެ.
ޕީސީބީ އިން ބުނީ މި މަގާމަށް ކުރިމަތިލުމަށް ޖުލައި 9 ވަނަ ދުވަހު ފުރުސަތު ހުޅުވާލެވި، ދިވެހި ސަރުކާރުގެ ގެޒެޓުގައި ޝާއިއުކޮށްފައިވާކަމަށެވެ. މި މަގާމަށް ކުރިމަތި ލުމުގެ ޝަރުތުތަކަކީ:
-
މޯލްޑިވްސް ކޮލިފިކޭޝަން އޮތޯރިޓީން ފެންވަރު ކަނޑައަޅާފައިވާ އިންޓަނޭޝަނަލް ފެޑަރޭޝަލް އޮފް އެކައުންޓިން (އައިއެފްއޭސީ) އިން ގަބޫލުކުރާ ޕްރޮފެޝަނަލް އެކައުންޓިން ބޮޑީއެއްގެ މެންބަރަކަށްވުން
-
ބުއްދި ސަލާމަތުން ހުރުން
-
އުމުރުން 18 އަހަރު ފުރިހަމަވުން
-
އިސްލާމްދީނުގައި ހައްދެއް ކަނޑައެޅިފައިވާ ކުށެއްކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން، ނުވަތަ އެފަދަ ކުށެއް ސާބިތުވެ ހުކުމެއް ކުރެވިފައިވާ ފަރާތެއްނަމަ، އެ ހުކުމެއް ތަންފީޒުކޮށް ނިމުނުތާ ނުވަތަ އެ ހުކުމުން ކަނޑައެޅުނު އަދަބު މާފު ކުރެވުނުތާ 5 އަހަރުވެފައިވުން
-
އެ މީހަކީ ތިރީގައި ބަޔާންކުރާ ގާނޫނުތަކުގައި ބަޔާންކުރާ ކުށްތަކުގެ ތެރެއިން އެއްވެސް ކުށެއް ސާބިތުވެފައިވާ މީހެއްނަމަ، އެ ކުށަކާއި ގުޅިގެން ކުރެވުނު ހުކުމް ތަންފީޒުކޮށް ނިމި ނުވަތަ އެ ކުށަކަށް މާފު ދެވުނު ތާރީހުން ފެށިގެން 10 އަހަރު ހަމަވެފައިވާ މީހެއްކަމުގައިވުން
- މީހުން ޓްރެފިކް ކުރުން ހުއްޓުވުމުގެ ގާނޫނު
- ކޮރަޕްޝަން ހުއްޓުވުމާއި މަނާކުރުމުގެ ގާނޫނު
- މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނު
- ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނު
-
އިފްލާސްކުރެވިފައިވާ ފަރާތެއްކަމުގައިނުވުން
-
އަދާކުރަންޖެހޭ އެއްވެސް ސާބިތު ދަރަންޏެއް އޮތް މީހެއްނަމަ، ހުކުމާއި އެއްގޮތަށް އެ ދަރަނި އަދާކުރަމުން ދިއުން
-
ޑިރެކްޓަރެއްގެ މަގާމު އަދާކުރަމުންދިޔަ ކުންފުންޏެއް ބަނގުރޫޓްވެފައިވާނަމަ، ކުންފުނި ބަނގުރޫޓުވި ތާރީހުން ފެށިގެން މަދުވެގެން، 5 އަހަރު ފާއިތުވެފައިވުން
-
ޝަތުރު 3 އަދި 4 ގައި ބަޔާންކުރާ ކުށްތައް ފިޔަފައި ގާނޫނު އުގޫބާތުގައި ޖިނާޔަތުގެ ދަރަޖައިގެ ތެރޭގައި ހިމެނޭ ކުށެއް ކުރިކަން ސާބިތުވެފައިވާނަމަ، އެ ކުށެއްގެ ހުކުމް ތަންފީޒުކޮށް ނިމި ނުވަތަ އެ ކުށަކަށް މާފު ދެވުނު ތާރީހުން ފެށިގެން 3 އަހަރު ހަމަވެފައިވުން
-
ކެޕިޓަލް މާކެޓް ޑިވެލޮޕްމަންޓް ޑިވެލޮޕްމަންޓް އޮތޯރިޓީއިން ހިންގާ ކޯޕަރޭޓް ގަވާނެންސް ޕްރޮގްރާމް ފުރިހަމަކޮށްފައިވާ ނުވަތަ ކޯޕަރޭޓް ގަވާނެންސް އުސޫލުތަކަށް އަހުލުވެރިކޮށްދޭ ތަމްރީން ޕްރޮގްރާމެއް ފުރިހަމަކޮށްފައިވާ ފަރާތަކަށްވުން ނުވަތަ އައްޔަންކުރާތާ 6 މަސްދުވަސް ތެރޭ އެފަދަ ޕްރޮގްރާމެއް ފުރިހަމަކުރަން އެއްބަސްވުން
ޕީސީބީ އިން ބުނީ މި މަގާމަށް ޝަރުތު ހަމަވެ ޝައުގުވެރިވާ ފަރާތްތަކުން ޖުލައި 15 ގެ 13:00 ގެ ކުރިން އޮންލައިން ކޮށް ފޯމު ފިލް ކުރެވޭނެެ ކަމަށެވެ. އަދި މި ފޯމާއެކު ހުށަހަޅަން ޖެހޭ ތަކެތީގެ މައުލޫމާތު އެ ކުންފުނީގެ ވެބްސައިޓުން ނުވަތަ ގެޒެޓުންވެސް ބަލާލެވޭނެއެވެ.
