ސްޓޫޑެންޓް ލޯނާއި ސަރުކާރުގެ ސްކޯލާޝިޕްތަކުގައި ބޭރު ގައުމުތަކުގައި ކިޔަވާ ދަރިވަރުންނަށް ފައިސާ ލިބުން ލަސްވާ ކަމަށް ބުނެ ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފިއެވެ.
ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހެޅުއްވި މައްސަލައިގައި ވިދާޅުވީ ދަރިވަރުންނަށް ލިބެން ޖެހޭ ފައިސާ ނުލިބި ލަސްވާތީ ބައެއް ދަރިވަރުންނަށް ފައިސާ ދެއްކުމުގައި ދަތިތަކާ ކުރިމަތިވެފައިވާ ކަމަށާއި، ދަރިވަރުން ދިރިއުޅޭ ތަންތަން ހުސްކުރަން ޖެހި، ހަރަދުތައް ނުކުރެވޭ ހިސާބަށް ގޮސްފައިވާ ކަމަށެވެ.
މިކަމުގައި ދަރިވަރުންނަށް އެއްވެސް ޖަވާބެއް ސަރުކާރުން ނުދޭ ކަމަށް ވެސް ވިދާޅުވިއެވެ.
އެހެންކަމުން އެ ފައިސާ މިހާރުން މިހާރަށް ޖަމާކުރުމަށް ސަރުކާރަށް ގޮވާލައި ކުއްލި މައްސަލައެއް ހުށަހަޅާ ކަމަށް، އޭނާ ވިދާޅުވިއެވެ.
މި މައްސަލަ ހުށަހަޅުއްވަމުން ނާޒިލް ވަނީ، ސަރުކާރުން ބޭކާރު ހަރަދުތައް ކުރާ ކަމަށް ވިދާޅުވެ، ސަރުކާރަށް ވަރަށް ބޮޑަށް ފާޑު ވެސް ވިދާޅުވެފައެވެ.
މި މައްސަލަ މަޖިލީހަށް ބަލައިގަނެ ބަހުސްކުރުމާ މެދު ގޮތެއް ނިންމުމަށް ރިޔާސަތުން އެހުމުން، މިކަމަށްޓަކައި ނެގި ވޯޓުގައި ބައިވެރިވި 71 މެންބަރުންގެ ތެރެއިން، 59 މެންބަރުންގެ ވޯޓާ އެކު މައްސަލަ ވަނީ ބޭރުކޮށްލައިފައެވެ.
