ކޮލެޖުތަކަށް ޔުނިވާސިޓީއެއްގެ ދަރަޖަ ދިނުމުގައި ބަލާ މުއްދަތު ދަށްކުރާ އިސްލާހު ރައްޔިތުންގެ މަޖިލީހަށް އަލުން ވައްދައިފިއެވެ.
މި މަޖިލީހުގެ ވެސް ތުލުސްދޫ ދާއިރާގެ މެންބަރު އިބްރާހީމް ނަސީމް މިދިޔަ 19 ވަނަ މަޖިލީހުގައި އޭރު ހުށަހެޅުއްވި މި އިސްލާހު ވަނީ ބޭރުކޮށްލާފައެވެ.
މި ހިނގާ 20 ވަނަ މަޖިލީހަށް އެ އިސްލާހު އަލުން ހުށަހެޅުއްވީ ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެވެ.
މަތީ ތައުލީމާއި ތަމްރީނުގެ ގާނޫނަށް ހުށަހެޅި މި އިސްލާހު ފާސްވެއްޖެ ނަމަ، ކޮލެޖެއް މެދުނުކެނޑި ހިންގާތާ 15 އަހަރުވެއްޖެ ނަމަ ޔުނިވާސިޓީއެއްގެ ދަރަޖަ ދެވޭނެއެވެ. ގާނޫނުގައި މިހާރު އޮންނަ ގޮތުން ކޮލެޖަކަށް ޔުނިވާސިޓީއެއްގެ ދަރަޖަ ދެވޭނީ އެ ތަނެއް ހިންގާތާ 20 އަހަރު ވުމުންނެވެ. ރާއްޖޭން ބޭރުގައި ނަމަ 10 އަހަރު ވުމުންނެވެ.
އޭގެ އިތުރުން އެ އިސްލާހުގައި ފަސް ދާއިރާ އެއް ހިމަނައި، މަދުވެގެން ތިން ދާއިރާއަކުން ލެވަލް ހަތަކާއި ނުވައެއްގެ ޕްރޮގްރާމްތައް އެ ކޮލެޖަކުން ނުވަތަ ބޭރުގެ ޔުނިވާސިޓީއަކުން ހިންގަން ޖެހޭނެ ކަމަށް ވެސް ހިމަނާފައިވެއެވެ. އެ ދާއިރާތަކަކީ:
- ސޯޝަލް ސައިންސް
- ލައިފް ސައިންސް އެންޑް މެޑިސިން
- ނެޗަރަލް ސައިންސް
- އާޓްސް އެންޑް ހިއުމަނިޓީ
- އިންޖިނިއަރިން އެންޑް ޓެކްނޮލޮޖީ
އަދި 500 ކުދިން ކޮލެޖެއްގައި ތިބެން ޖެހޭނެ ކަމަށާއި، އެކަޑެމިކް ޕްރޮގްރާމްތަކުގައި ކިޔަވައިދޭ ލެކްޗަރާއިންގެ ތެރެއިން 10 ޕަސެންޓު ލެކްޗަރާއިން ޕީއެޗްޑީ ހާސިލްކޮށްފައި އޮންނަން ޖެހޭނެ ކަމަށް ވެސް އެ އިސްލާހުގައިވެއެވެ.
