ރައްޔިތުންގެ މަޖިލީހުގެ މެންބަރުން އަމިއްލައަށް މުސާރަ އާއި އިނާޔަތްތައް ކަނޑައެޅުމަކީ މަސްލަހަތު ފުށޫއަރާ ކަމެއް ކަމަށް ވިދާޅުވެ، ދައުލަތުގެ އެހެނިހެން އިދާރާތަކާއި މެންބަރުންގެ މުސާރަ އެއްހަމަކުރުމަށް، ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ގޮވާލައްވައިފިއެވެ.
މަޖިލީހުގެ މެންބަރުންގެ އަދަދު އިތުރުވަމުންދާތީ މެންބަރުންގެ އަދަދު މަދުކުރުމާ ގުޅޭ ގޮތުން މެންބަރުންގެ ހިޔާލު ހޯދުމަށް ޕީއެންސީގެ ޕާލިމެންޓްރީ ގްރޫޕުގެ ސީނިއާ ޑެޕިއުޓީ ލީޑަރު އަދި ބާރަށު ދާއިރާގެ މެންބަރު އިބްރާހީމް ޝުޖާއު ހުށަހެޅުއްވި ގަރާރަށް ބަހުސްކުރައްވަމުން މުހައްމަދު ވިދާޅުވީ، މި ހިނގާ 20 ވަނަ މަޖިލީހަކީ މެންބަރުންގެ މުސާރަ އާއި އިނާޔަތްތަކަށް ރެކޯޑު އަދަދަކަށް ހޭދަކުރެވޭ ފަހަރެއް ކަމަށެވެ. އޭނާ ވިދާޅުވީ ވޭތުވެދިޔަ މަޖިލީހާ އަޅާ ބަލާއިރު މެންބަރުންގެ މުސާރައަށް 30 މިލިއަން ރުފިޔާ އިތުރުވެފައިވާ ކަމަށެވެ.
މިއީ ދެމެހެއްޓެނިވި ގޮތެއްގައި ކުރެވޭ ހަރަދުތަކެއް ނޫން ކަމަށް އޭނާ ވިދާޅުވިއެވެ.
"އަޅުގަނޑުމެން އެބަޖެހޭ އަސާސީ މުސާރައާއި އެލަވަންސްތައް މަދުކުރަން، އަޅުގަނޑުމެންގެ މުސާރަ އާއި އިނާޔަތްތައް ދައުލަތުގެ އެހެން މުއައްސަސާތަކުގެ އިނާޔަތްތަކާ އެއްހަމަކުރަން، މަޖިލީހުގެ މެންބަރުން އަމިއްލައަށް މުސާރަ އާއި އިނާޔަތްތައް ކަނޑައެޅުމަކީ ވެސް މަސްލަހަތު ފުށޫއަރާ ކަމެއް،"
ބައެއް ގައުމުތަކުގައި އެ ގައުމުތަކުގެ ގާނޫނުހަދާ މަޖިލިސްތަކުގެ މުސާރަ ކަނޑައަޅަނީ މިނިވަން އިދާރާތަކުންކަން މުހައްމަދު ފާހަގަކުރައްވައި، މިސާލެއްގެ ގޮތަށް ނެންގެވީ އޮސްޓްރޭލިއާއެވެ. ރާއްޖޭގައި ޕޭ ކޮމިޝަނެއް އޮންނަކަން ފާހަގަކުރައްވައި އޭނާ ވިދާޅުވި ގޮތުގައި، އޮސްޓްރޭލިއާގައި މެންބަރުންގެ މުސާރަ ކަނޑައަޅަނީ ސަރުކާރާއި އިގްތިސޯދާއި ގާނޫނާއި ޕަބްލިކް އެޑްމިނިސްޓްރޭޝަންގެ މައްޗަށް އެކުލެވިގެންވާ އިދާރާއަކުންނެވެ.
މެންބަރުންގެ އަދަދު މަދުކޮށް، ގާނޫނުއަސާސީ އިސްލާހުކުރުމަށް ތިން ހުށަހެޅުމެއް އޭނާ ހުށަހެޅުއްވިއެވެ. އެއީ:
- 5،000 ގެ އާބާދީ ތަމްސީލުކުރާ މެންބަރުންގެ އަދަދު 1 އަށް ތިރިކުރުމަށް
- 5،000 އަށް ވުރެ އިތުރުވާ ކޮންމެ އާބާދީއަކަށް މެންބަރަކު އިންތިހާބުކުރުމުގެ ބަދަލުގައި އެ އަދަދު 7،000 އަށް އިތުރުކުރުމަށް
- މަޖިލީހުގެ މެންބަރުކަން ފަސް އަހަރުގެ ދެ ދައުރު ކުރެވޭ ގޮތް ހެދުމަށް
އޭރުން ރައްޔިތުންގެ މަޖިލީހުގައި ތިބޭނީ 72 މެންބަރުން ކަމަށާއި، ދައުލަތުގެ ބަޖެޓުން 108 މިލިއަނަށް ވުރެ ގިނަ ރުފިޔާ ސަލާމަތްކުރެވޭނެ ކަމަށް އޭނާ ވިދާޅުވިއެވެ.އަދި ވޯޓުލުމުގެ ހައްގު ލިބިގެންވާ މީހުން އިތުރުވެ، ގޮނޑިތައް ގަތުން ހުއްޓުވިގެން ދާނެ ކަމަށް ވެސް ވިދާޅުވިއެވެ.
"ގިނަ މެންބަރުން ތިބެގެން ހާސިލްވަނީ ކޮން ކަމެއްތޯ، އޭގެން ރައްޔިތުންނަށް ކުރާ ފައިދާއަކީ ކޮބައިތޯ،" އޭނާ ސުވާު އުފެއްދެވިއެވެ.
މުހައްމަދު ވިދާޅުވީ، މިއީ ހުރިހާ ޕާޓީތަކުން އަމިއްލަ އެދުން އެއްފަރާތްކޮށް، މިކަމަށް އަވަސް ފިޔަވަޅު އަޅަން އެންމެ ރަނގަޅު ވަގުތު ކަމަށެވެ.
