ދައުލަތުގެ ދަރަނި ދެއްކުމަށް ސަރުކާރުގެ އިސްލާސްތެރިކަމެއް ހުރިނަމަ ފުރަތަމަ ކުރަންވީ ކަމަކީ ސިޔާސީ މުވައްޒަފުންގެ އަދަދާއި އެމީހުންގެ މުސާރައަށް ހޭދަވާ ފައިސާގެ އަދަދު ހާމަކުރުން ކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވެއްޖެއެވެ.
ދައުލަތުގެ ދަރަންޏާ ބެހޭ ބިލަށް ވާހަކަ ދައްކަމުން މިއަދުގެ ރައްޔިތުންގެ މަޖިލީހުގެ ޖަލްސާގައި މީކާއީލް ވަނީ އަދަދު ނޭނގޭހާ ގިނަ ސިޔާސީ މުވައްޒަފުން އެކި މަގާމުތަކަށް ނަގަމުން އައީ މި ދިވެހިރާއްޖޭގެ މާލީ ހާލަތު އެނގިވަޑައިނުގެންތޯ ނުވަތަ އެއީ ގަސްތުގައި ދިވެހިރާއްޖެ އަނދަވަޅަކަށް ވައްޓާލަން ކުރެއްވި ކަމެއް ކަމާމެދު ސުވާލު އުފައްދަވާފައެވެ.
ސިޔާސީ މުވައްޒަފުންނަށް އާމްދަނީ ދެނީ ދިވެހި ރައްޔިތުން ޓެކްސް ފައިސާއިންކަން ފާހަގަ ކުރައްވާ މީކާއީލް ވިދާޅުވީ ދިވެހި ރައްޔިތުން އާމްދަނީ ދެމުން އަންނަ މީހުންގެ އަދަދުވެސް ރައްޔިތުންނަށް ނޭނގޭ ކަމަށެވެ. އަދި އޭހާ ވެސް ދަށު ދަރަޖައިގެ ބަޔަކަށް މި ސަރުކާރުން ރައްޔިތުން ހަދާފައިވާ ކަމަށެވެ.
މީކާއީލް ވިދާޅުވީ ދަރަނީގެ ވާހަކަ މި ސަރުކާރަށް ދެއްކެން ނެތް ކަމަށާއި މިއަދު ދަރަނީގެ ވާހަކަ ދައްކަން ކުޑަ ވެސް އިހުލާސްތެރިކަމެއް ހުރިނަމަ، އެންމެ ފުރަތަމަ ކުރަންވީ ކަމަކީ ސިޔާސީ މުވައްޒަފުންގެ އަދަދާއި އެމީހުންނަށް ހިނގާ ހަރަދު ހާމަކުރެއްވުން ކަމަށެވެ. އަދި 400 މުވައްޒަފުން ކަނޑާލާނަމޭ ބުނުމަކުން ނުފުދޭ ކަމަށް އޭނާ ވަނީ ވިދާޅުވެފައެވެ.
2019 އިން 2023އަށް ދިވެހިރާއްޖޭގެ ތާރީހުގައި ވެސް ނުދައްކާހާ ގިނަ ދަރަނި ދިވެހި ދައުލަތުން ދެއްކި ކަމަށް މީކާއީލް ވިދާޅުވިއެވެ. އަދި އެއީ ޕީޕީއެމްގެ ސަރުކާރުން ދިވެހި ދައުލަތަށް ވާރުތަކުރި ދަރަނި ކަމަށް އޭނާ ވަނީ ވިދާޅުވެފައެވެ. އެގޮތުން ނިމިދިޔަ 5 އަހަރުގެ ތެރޭގައި 24.7 ބިލިއަން ރުފިޔާ ދިވެހި ދައުލަތުން ދަރަނީގެ ގޮތުގައި އަދާ ކުރިކަން މީކާއީލް ފާހަގަ ކުރެއްވެވިއެވެ.
