އިއްޒުއްދީން ފާލަން ނުވަތަ ރަސްމީ ފާލަން ރަނގަޅު ފެންވަރަކަށް ހެދުމަކީ މުހިއްމު ކަމެއް ކަމަށާއި އެއީ ދައުލަތަށް އާމްދަނީ ވެސް ލިބޭނެ ކަމެއް ކަމަށް ކޮންސްޓަރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިދިޔަ ސަރުކާރުން ކުރި ހަރަދުތަކުގެ ސަބަބުން ރާއްޖޭގެ އިގްތިސޯދަށް ލިބިފައިވާ ގެއްލުމުގެ ވާހަކަ މި ސަރުކާރުން ދައްކަމުން އަންނަ އިރު، ރަސްމީ ފާލަން ރޫޅާލައި އެތަނުގައި އާ ޑިޒައިނަކަށް ރަސްމީ ފާލަން އަޅަން ކުރަމުންދާ މަސައްކަތަށް ބައެއް ފަރާތްތަކުން އަންނަނީ ފާޑުކިޔަމުންނެވެ. މިގޮތަށް އާންމުންގެ މީހަކު ކުރި ޕޯސްޓަކަށް ޖަވާބު ދެއްވަމުން ކޮންސްޓަރަކް މިނިސްޓަރު ވަނީ އެ ފާލަން މަރާމާތު ކުރާ ސަބަބު ހާމަ ކުރައްވާފައެވެ.
މުއްތަލިބް ވިދާޅުވީ، ރަސްމީ ފާލަން މަރާމާތު ނުކޮށް އެތައް އަހަރެއް ވުމުގެ ސަބަބުން ފާލަމުގެ މަތީބައި ހަލާކުވެ ނުރައްކާތެރި ހާލަތަކަށް ގޮސްފައިވާ ކަމަށެވެ. އެހެންކަމުން އެ ފާލަމުގެ މަތީ ބައި އަލުން ހެދުމަށް ނިންމައި އެމްޓީސީސީ އާ އެކު އެއްބަސްވުމުގައި ސޮއިކޮށްފައި ވަނީ މިދިޔަ އަހަރުގެ އޮގަސްޓް މަހުގެ 14 ވަނަ ދުވަހުގައި ކަމަށެވެ.
ރަސްމީ ފާލަމަކީ ވަރަށް ގިނަ ރިސޯޓުތަކުން ފީ ދައްކައިގެން ދައުލަތަށް އާމްދަނީ ލިބޭގޮތަށް ބޭނުންކުރާ ފާލަމެއް ކަމަށާއި އެ ފާލަން ރަނގަޅު ފެންވަރަކަށް ހެދުމަކީ މުހިއްމު ކަމެއް ކަމުގައި އޭނާ ވިދާޅުވިއެވެ.
ރަސްމީ ފާލަން މަރާމަތު ކުރުމުގެ މަޝްރޫއަކީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން 11.7 މިލިއަން ރުފިޔާއަށް 270 ދުވަސް ތެރޭ ނިންމުމަށް އެމްޓީސީސީ އާއި ހަވާލުކޮށްފައިވާ މަސައްކަތެކެވެ. މި މަޝްރޫގެ ދަށުން، ކުރީގެ ޖެޓީ ރޫޅާލުމާއި، އާ ޖެޓީގެ ކޮންކްރީޓް މަސައްކަތާއި ސްޓީލް ސްޓަރަކްޗާ ފަރުމާ ކުރުމުގެ އިތުރުން ލަކުޑި އަދި މަތިވަޑާމުގެ މަސައްކަތްވެސް ކުރުމަށް ހަމަޖެހިފައިވާ ކަމަށް އެމްޓީސީސީން ބުނެއެވެ.
