އިއްޒުއްދީން ފާލަން ނުވަތަ ރަސްމީ ފާލަން ތަރައްގީ ކުރުމުގެ އަމަލީ މަސައްކަތް އެމްޓީސީސީ އިން ފަށައިފިއެވެ.
އެމްޓީސީސީ އިން ބުނީ މި މަޝްރޫގެ ދަށުން، ކުރީގެ ޖެޓީ ރޫޅާލުމާއި، އާ ޖެޓީގެ ކޮންކްރީޓް މަސައްކަތާއި ސްޓީލް ސްޓަރަކްޗާ ފަރުމާކުރުމުގެ އިތުރުން ލަކުޑި އަދި މަތިވަޑާމުގެ މަސައްކަތްވެސް ކުރެވިގެން ދާނެ ކަމަށެވެ.
މި މަޝްރޫއަކީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން 11.7 މިލިއަން ރުފިޔާއަށް 270 ދުވަސް ތެރޭ ނިންމުމަށް އެމްޓީސީސީ އާއި ހަވާލުކޮށްފައިވާ މަސައްކަތެކެވެ. އިއްޒުއްދީން ފާލަން ބޭނުންކުރަމުން ދަނީ ރަސްމީ ދަތުރުފުޅުތަކުގައި ރާއްޖެއަށް ޒިޔާރަތްކުރައްވާ ބޭރު ގައުމުތަކުގެ އިސްވެރިންނާއި އިއްޒަތްތެރިން މާލޭއަށް ފައިބައިވަޑައިގަތުމަށެވެ.
އެގޮތުން މި ފާލަން ދިވެހިރާއްޖޭގެ މިނިވަންކަމަށް 50 އަހަރުފުރުމުގެ މުނާސަބާތާއި ގުޅިގެން އެންމެ ފަހުން ފަރުމާކޮށްފައިވަނީވެސް އެމްޓީސީސީ އިންނެވެ. އެމްޓީސީސީ އިން ބުނީ ވޭތުވެދިޔަ އަހަރުތަކުގެ ތެރޭގައި މި ފާލަން ވަރަށް ބޮޑަށް ވީރާނާވެ މަރާމާތަށް ބޭނުންވެފައިވާކަމަށާއި، އެމްޓީސީސީ އިން އަލުން ތަރައްގީކުރާ މި ފާލަން ގިނަ ދުވަހު ބޭނުންކުރެވޭފަދަ ފެންވަރު ރަނގަޅު ފާލަމަކަށްވާނެކަމަށެވެ.
މީގެއިތުރުން މި ފާލަމަކީ ދިވެހީންގެ ގައުމިއްޔަތާއި ސަގާފަތް ރަމްޒުކޮށްދޭ ފާލަމަކަށްވެސް ވެގެން ދާނެ ކަމަށް އެމްޓީސީސީ އިން ވަނީ ބުނެފައެވެ. އެމްޓީސީސީ އިން ދަނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްގީގެ ގިނަ މަޝްރޫތަކެއް ހިންގަމުންނެވެ.
ފޮޓޯއިން މި ފެންނަގޮތަށް އެއްފުރާޅުމަތީ އަނެއް ފުރާޅު އޮތީމާ ވަރަށް ހުތުރު ވާނެ.