ޖަލަށް ފޯނާއި މަސްތުވާތަކެތި ވައްދާ، ފައިސާގެ ގިނަ މުއާމަލާތްތަކާ ގުޅޭ މައްސަލައިގައި ހައްޔަރު ކުރި 13 މީހުން ބަންދުކޮށްފިއެވެ.
ޖަލުން ފޯނާއި މަސްތުވާތަކެތި ފެންނަ މައްސަލައިގައި ތަހުގީގު ހިންގަން ފަށާފައި ވަނީ މީގެ 3 މަސް ކުރިންނެވެ. އެއާއެކު މިދިޔަ ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި އިހުސާން ވަނީ އެކަމަށް ހާއްސަ އޮޕަރޭޝަނެއް ކުރިއަށް ގެންދާ ކަމަށް ވިދާޅުވެފައެވެ.
އެރޭގެ ޕްރެސްގައި އެސިސްޓެންޓް ކޮމިޝަނާ އޮފް ޕޮލިސް އަބްދުالله ޝަރީފު ވިދާޅުވީ, މިހާތަނަށް ބެލިބެލުމުން 18 މުވައްޒަފެއްގެ އެކައުންޓުގައި 73,600,000ރ. ޖަމާވެފައި ހުރި ކަމަށެވެ. އަދި މާފުށީ ޖަލުގައި މި އޮޕަރޭޝަން ކުރިއަށް ދާއިރު މިހާތަނަށް އެ މައްސަލައިގައި ވަނީ 13 އޮފިސަރަކު ހައްޔަރުކޮށްފައެވެ.
ފުލުހުން ބުނީ މި 13 މީހުންގެ ތެރެއިން 9 މީހުން ހައްޔަރުކޮށްފައި ވަނީ މާފުށިން ކަމަށެވެ. ކާށިދޫއިން 2 މީހުން ހައްޔަރުކޮށްފައި ވާއިރު އުތީމުން މީހަކު އަދި މާލެއިން މީހަކު ހައްޔަރުކޮށްފައިވާ ކަމަށް ފުލުހުން ވަނީ މީގެ ކުރިން މައުލޫމާތު ދީފައެވެ. މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 11 އޮފިސަރުން ވަނީ ޝަރީއަތް ނިމެންދެން ބަންދުކުރިއިރު އަނެއް ދެ މީހުން ވަނީ 5 ދުވަހަށް ބަންދުކޮށްފައެވެ.
މި މައްސަލަ ތަހުގީގު ކުރަމުން ދާ އިރު މި މުވައްޒަފުންގެ އެކައުންޓްތަކަށް ފައިސާ ޖަމާކުރި ފަރާތްތައް ވެސް ދެނެގަތުމުގެ މަސައްކަތް ކުރަމުން ދެއެވެ. އެ ފަރާތްތަކުގެ އެކައުންޓަށް އާދަޔާ ހިލާފަށް ފައިސާ ޖަމާވެފައި ހުރި އިރު, 73 މިލިއަނަކީ 2023 ގެ ޖެނުއަރީން ފެށިގެން މިހާތަނަށް ޖަމާވެފައި ހުރި ފައިސާއެވެ.
މި މައްސަލާގައި ހިމެނޭ ހުރިހާ ފަރާތްތަކާ ގުޅޭ މައްސަލަ ތަހުގީގު ކޮށް އެޅެން އޮތް އެންމެ ހަރުކަށި ފިޔަވަޅު އަޅުއްވާނެ ކަމަށާއި, މި ޖަރީމާގައި ހިމެނޭ މުވައްޒަފުންގެ ތެރެއިން 6 މީހަކު މީގެ ކުރިން ވަޒީފާއިން ވަކިވެގެން ގޮސްފައި ވާ ކަމަށް އިހްސާން ވަނީ ވިދާޅުވެފައެވެ. ނަމަވެސް އެ 6 މީހުންގެ މައްސަލަވެސް ބައްލަވާނެ ކަމަށް އޭނާ ވިދާޅުވިއެވެ.
