މިދިޔަ އަހަރު، ނ.މަނަދޫގައި އަނިޔާވެރި ގޮތަކަށް މަރާލި އަންނާރުމާގެ ނައީމާ މޫސާގެ މައްސަލައިގެ ބައެއް ހެކިތައް ސިއްރުކުރުމަށް މިއަދު ކްރިމިނަލް ކޯޓުން ނިންމައިފިއެވެ.
މިދިޔަ އަހަރު އަނިޔާވެރި ގޮތަކަށް ނައީމާ މަރާލި މައްސަލާގައި ދައުލަތުން ދައުވާކުރަނީ އެ ރަށުގެ ތިން މީހެއްގެ މައްޗަށެވެ. އެއީ ހުސެއިން ފަވާޒް، އަބްދުލްވަހީދު ރިފާޝް، އަދި އަހުޒަމް އަބްދުލްޝަކޫރުގެ މައްޗަށެވެ. މި ތިން މީހުންގެ މައްޗަށް ކޮށްފައިވަނީ ގަސްދުގައި މީހަކު މެރުމުގެ ދައުވާ އާއި އަދުލު އިންސާފު ގާއިމްކުރަން ހުރަސް އެޅުމުގެ ދައުވާގެ އިތުރުން މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާއެވެ.
މިއަދު ބޭއްވި އަޑުއެހުމުގައި ބައެއް ހެކިތައް ސިއްރު ކުރަން ދައުލަތުން އެދިފައިވާއިރު ދައުލަތުން ބުނީ، އެ މައުލޫމާތު އާންމުވެއްޖެ ނަމަ އެ މީހުންނަށް ނުރައްކަލެއް އޮތުމުން ކަމަށެވެ. ނައީމާ މަރާލާފައި އޮތް މަންޒަރު ހިމެނޭ ފޮޓޯ އާއި ވީޑިއޯތައް ވެސް އާންމު ކުރުމަކީ އެކަށީގެންވާ ކަމަކަށް ނުވާތީ އެ ތަކެތި ވެސް ހަމައެކަނި ކޯޓުގައި ތިބެގެން ބެލޭ ގޮތަށް ސިއްރުކުރަން ދައުލަތުން ވަނީ އެދިފައެެވެ.
މި މައްސަލައިގައި ދައުވާ އަށް ޖަވާބުދާރީވުމަށް ފުރުސަތު ދިނުމުން ދައުވާ ލިބޭ ތިން މީހުންގެ ދިފާއީ ވަކީލުން ވަނީ ލިޔުންތައް ދިރާސާ ކުރުމަށް ފަހު، ޖަވާބުދާރީވުމަށް ފުރުސަތު ދޭން އެދޭ ކަމަށެވެ. އެހެންކަމުން އެ ފުރުސަތު ދިނުމަށް ކޯޓުން ނިންނާމައިވާއިރު، ކޯޓުން ވަނީ ދައުލަތުން އެދުނު ގޮތަށް ބައެއް ހެކިތައް އެއްކޮށް ސިއްރު ކުރުމަށާއި އަނެއް ބައި ހެކިތައް ކޯޓުގައި އެކަނި ބެލޭ ގޮތަށް ވަކި މިންވަރަކަށް ސިއްރު ކުރުމަށް ނިންމާފައެވެ.
ނައީމާ ދިރިއުޅޭ ކޮޓަރީގައި ގިނަ ޒަހަމްތަކަކާއެކު އޭނާ މަރުވެފައި އޮއްވާ ފެނުނު އިރު ގައިގެ އެކި ތަންތަނަށް ތޫނު އެއްޗަކުން ގިނަ ހަމަލާތަކެއް ވަނީ ދީފައެވެ. އޭނާ މަރުވެފައި އޮއްވާ ފެނުނީ އޭނާގެ ހަބަރެއް ނުވާތާ ދެ ދުވަހެއް ވެގެން އެ ރަށުގެ ބައެއް މީހުންނާއެކު ފުލުހުން އެގެއަށް ވަދެ ބެލުމުންނެވެ.
