މިފްކޯއިން މަސްވެރިންނަށް ދޭންޖެހޭ ފައިސާ ނުލިބޭ ކަމަށް ބުނެ އައްޑޫ ސިޓީގެ މަސްވެރިން ކުރާ އިހުތިޖާޖު މިއަދުވެސް ކުރިއަށް އެބަދެއެވެ.
ގިނަ އަދަދެއްގެ މަސްވެރިންނާއެކު އިއްޔެ ހަވީރުން ފެށިގެން އައްޑޫ ސިޓީގައި އިހުތިޖާޖު ކުރަމުން ދާއިރު އިހުތިޖާޖުގެ ބައިވެރިން ގޮވާލަމުން ދަނީ މަސްވެރިންނަށް ދޭންޖެހޭ ފައިސާ މިހާރުން މިހާރަށް ދިނުމަށާއި ކުރިއަށް އޮތް ދުވަސްތަކުގައި ކިރުވާ މަހަށް ކޮންމެ 15 ދުވަހަކުން ފައިސާ ދިނުމަށް ސަރުކާރުން އެއްބަސްވުމަށެވެ.
އަދި ހަމައެހެންމެ މަސްވެރިކަމާ ބެހޭ ވުޒާރާގެ އިސް ބޭފުޅަކު މަސްވެރިންގެ ޝަކުވާތައް އަޑުއެއްސެވުމަށް އިހުތިޖާޖުގެ ބައިވެރިންގެ ގާތަށް ވަޑައިގަތުމަށް ވެސް އެމީހުން ދަނީ ޑިމާންޑް ކުރަމުންނެވެ. އަދި މި މައްސަލަތަކަށް ހައްލެއް ނުލިބެނީސް އިހުތިޖާޖު ހުއްޓާނުލާނެ ކަމަށް މަސްވެރިން ބުނެއެވެ.
މިކަމާ ގުޅިގެން ފިޝަރީޒް މިނިސްޓްރީގެ ބަހެއް ހޯދުމަށް ކުރި މަސައްކަތް ވަނީ ނާކާމިޔާބު ވެފައެވެ. އައްޑޫ ސިޓީގައި މަސްވެރިންނަށް ލިބެންޖެހޭ ފައިސާ ނުލިބި އިހުތިޖާޖު ކުރަމުން ދާއިރު ދާދިފަހުން މަސްވެރިން ވަނީ ގދ. މަޑަވެލީގެ އިތުރުން މާލޭގައި ވެސް އިހުތިޖާޖެއް ކޮށްފައެވެ.
ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ) އިން އިސްނަގައިގެން ކުރިއަށް ގެންދިޔަ އެ އިހުތިޖާޖުތަކާ ގުޅިގެން ސަރުކާރުން ވަނީ މަސްވެރިންނަށް ނުދީ ހުރި 80 މިލިއަން ރުފިޔާގެ ތެރެއިން 46 މިލިއަން ރުފިޔާ ދޫކޮށްފައި ވާކަމަށް ބުނެފައެވެ.
މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދައްކާ ނިޒާމެއް ގާއިމު ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް ރާއްޖޭގެ މާލީ ހާލަތު ހުރި ގޮތުން އެ ފައިސާ ދިނުމުގައި ދަތިތަކެއް ދިމާވާ ކަމަށް ފިޝަރީޒް މިނިސްޓަރު، އަހުމަދު ޝިޔާމް ވަނީ މީގެ ކުރިންވެސް ވިދާޅުވެފައެވެ.
ރައީސް މުއިއްޒު ސަރުކާރާ ހަވާލުވެވަޑައިގެންނެވި އިރު ކުރީ ސަރުކާރުން މަސްވެރިންނަށް ނުދީ ހުރި 851 މިލިއަން ރުފިޔާ އެމަނިކުފާނުގެ ސަރުކާރުގައި ވަނީ ދޫކޮށް ހަލާސްކޮށްފައިކަން ފާހަގަ ކުރެވެއެވެ.
