ކ. ކަނޑުއޮތްގިރީގެ ބަދަލުގައި ހުޅުމާލެ އިން ބިމެއް ހޯދުމުގެ މަޝްވަރާތައް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އާއެކު ކުރަމުން އަންނަ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ބޮޑު ކަންނެލި މަސްވެރިން އިއްޔެ ކުރި މުޒާހަރާގައި މަސްވެރިންނާ ބައްދަލުކުރައްވާ ޝިޔާމް ވިދާޅުވީ ކަނޑުއޮތްގިރީގެ ހާލަތު އޮތީ ކަންނެލި ކިރަން އަދި ކަންނެލި ބާލަން ވެސް ވަދެވޭ ގޮތަކަށް ނޫން ކަމަށެވެ. އެހެންކަމުން ކަންނެލި ނެގުމުގެ މަސައްކަތް ހުޅުމާލެ އަށް ބަދަލު ކުރަން ސަރުކާރުން ބޭނުންވާކަން ފާހަގަކޮށް ޝިޔާމް ވަނީ އެކަމަށް މަސައްކަތްކުރަމުން ދާ ކަން ހާމަކުރައްވާފައެވެ.
މިފްކޯ އިން ބާޒާރަށް ނެރޭ އުފެއްދުންތައް ތައްޔާރު ކުރުމަށް ބޭނުން ކުރާ ކަނޑުއޮތްގިރީގައި ފެންވަރު ރަނގަޅު މަސް ފެސިލިޓީއެއް ގާއިމު ކޮށްފައިވީ ނަމަވެސް ބަނދަރު ތިލަވެ، އެއްގަމު ތޮށި ހަލާކުވެފައި ވާތީ ދޯނިފަހަރު ގާތްކުރަން އުދަގޫވުމުން، އެ ފެސެލިޓީގެ ބޭނުން އެންމެ ރަނގަޅު ގޮތުގައި ނުކުރެވެއެވެ.
ކުރީ ސަރުކާރުން އެމްޓީސީސީ އާއި ހަވާލުކޮށްގެން ކަނޑުއޮތްގިރީ ބަނދަރުގެ މަސައްކަތް ކުރިއަށް ގެންގޮސްފައިވާއިރު، އޭރު އެމްޓީސީސީ އިން ބުނީ މި މަޝްރޫއުގެ ތެރެއިން 10،000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާ، 10،000 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 125 މީޓަރުގެ ސަރަޙައްދެއްގައި އެއްގަމުތޮށި ލުމާއި، 265 މީޓަރުގެ ސަރަޙައްދެއްގައި ބޭރުތޮށި ލުމާއި، 63 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، ހާބާ ޕޭވްމަންޓް ހެދުމާއި، ބަނދަރު ބައްތި އާއި ނެރު ބައްތި ހަރުކުރުމުގެ މަސައްކަތްކޮށްފައިވާ ކަމަށެވެ.
މި ސަރުކާރުން މަސްވެރިކަމުގެ ސިނާއަތް ކުރިއަރުވާ، މަސްވެރިންނަށް ލިބޭ ނަފާ އިތުރުކުރުމަށް މަސައްކަތްކުރަމުން އަންނައިރު، މިހާރު ހުޅުމާލެއިން މަސްވެރިންނަށް ވިއްކާ ޑީސެލްގެ އަގު ޝެޑުތަކުން ވިއްކާ އަގަށް ވަނީ ހެޔޮކޮށްފައެވެ.
