ނިމިދިޔަ 19 ވަނަ މަޖިލީހުން ބޭރުކޮށްލި ސޮވެރިން ޑިވެލޮޕްމެންޓް ފަންޑުގެ ބިލު، 20 ވަނަ މަޖިލީހަށް އަލުން ހުށަހަޅައިފިއެވެ.
ސަރުކާރުގެ ފަރާތުން އެ ބިލު ހުށަހެޅުއްވީ ފުވައްމުލަކު މެދު ދާއިރާގެ މެންބަރު އަލީ ފަޒާދެވެ. އެ ބިލު ހުށަހެޅުއްވި ސަބަބެއް ކަމަށް ބުނެފައިވަނީ، ދައުލަތުގެ ދަރަނި ކުޑަކޮށް ދައުލަތުގެ މުއްސަނދިކަން އަންނަން ހުރި ޖީލުތަކަށް ވާރުތަކޮށްދިނުމަށްޓަކައި ސޮވެރިން ޑިވެލޮޕްމެންޓް ފަންޑެއް ގާއިމްކޮށް، އެ ފަންޑު ހިންގައި ބެލެހެއްޓުމާ ގުޅޭ އުސޫލުތައް ކަނޑައަޅައި ބަޔާންކުރުމުގެ ގޮތުންނެވެ.
މި ބިލު ހުށަހަޅާފައިވަނީ އޭރު ވެސް ހުށަހެޅި ގޮތަށް، އެއްވެސް އުނިއިތުރެއް ގެނައުމެއް ނެތިއެވެ.
މިދިޔަ މާޗް މަހުގެ 26 ވަނަ ދުވަހު ބޭއްވި ޖަލްސާގައި މަޖިލީހުން އެސްޑީއެފް ބިލު އޭރު ބޭރުކޮށްލީ، އެ ދުވަހުގެ ޖަލްސާގައި އެވަގުތު ތިއްބެވި 28 މެންބަރުންގެ ތެރެއިން ބިލަށް ދެ މެންބަރުން ވޯޓު ދެއްވުމުން، މަޖިލީހުގެ ކުރީގެ ނައިބު ރައީސް، ހޯރަފުށި ދާއިރާގެ ކުރީގެ މެންބަރު އަހްމަދު ސަލީމްގެ ވޯޓާ އެކުގައެވެ.
