މި އަހަރުގެ ހައްޖުގެ ދުވަސްވަރު ސައުދީ އަރަބިއްޔާގެ ފިނިހޫނު މިން އެވްރެޖްކޮށް ހުންނަ މިންވަރަށް ވުރެ މަތިވާނެ ކަމަށް ލަފާކުރެވޭތީ ހައްޖުވެރިން އެކަމަށް ސަމާލުކަން ދިނުމަށް ސައުދީ ސަރުކާރުން އިލްތިމާސްކޮށްފިއެވެ.
ސައުދީ އަރަބިއްޔާގެ މޫސުމާ ބެހޭ އިދާރަގައި ބޭއްވި ނޫސްވެރިންގެ ބައްދަލުވުމުގައި ވަނީ ހައްޖު ދުވަސްވަރު ފިނިހޫނު މިން 44 ޑިގްރީ ސެލްސިއަސް އަށް އަރާނެ ކަމަށް ލަފާކޮށްފައެވެ. އެއީ ސައުދީގެ އެވްރެޖް ފިނިހޫނު މިނަށްވުރެ އެކެއް ބައި ނުވަތަ ދޭއް ޑިގުރީ އަށް ވުރެ މަތީ މިންވަރެކެވެ. މީގެ އިތުރުން ސައުދީ މޫސުމާ ބެހޭ އިދާރައިން ބުނީ އެ ދުވަސްވަރު ވައިގެ ތެތްކަމުގެ އެވްރެޖް ނިސްބަތް ހުންނާނި 25 ޑިގްރީއަށް ކަމަށް ލަފާކުރެވޭކަމަށެވެ. އަދި އެ ދުވަސްވަރު ވާރޭވެހުމުގެ ފުރުސަތު ވަރަށް ކުޑަކަމަށް މޫސުމާ ބެހޭ އިދާރާއިން ވަނީ ބުނެފައެވެ.
ހައްޖު މޫސުމުގެ އިންތިޒާމުތައް ހަމަޖެހިފައިވާ ގޮތާއި ގުޅޭ މައުލޫމާތު ހިއްސާކުރަމުން ސައުދީ އިން ބުނެފައިވަނީ އެންސީއެމް އިން މިނާގައި، މީޑިއާ އާއި ހޭލުންތެރިކުރުމުގެ މަރުކަޒެއް ތައާރަފްކޮށްފައިވާކަމަށެވެ. އަދި އެ މަރުކަޒުން ކޮންމެ ދުވަހަކު މޫސުމާ ބެހޭ ބުލެޓިންތައް ދައްކާއިރު، ހައްޖުވެރިންނަށް ފަސް ބަހަކުން ހޭލުންތެރިކުރުމާ، ތައުލީމީ މެސެޖުތައް 24 ގަޑިއިރު ފޯރުކޮށް ދިނުމަށް 12 މީޑިއާ ޗެނަލް މެދުވެރިކޮށް ފޯރުކޮށްދޭނެ ކަމަށެވެ.
ސައުދީއިން ބުނީ މި މަރުކަޒުން ފޯރުކޮށްދޭ ހިދުމަތްތަކަކީ ނުކުޅެދުންތެރިކަން ހުންނަ ހައްޖުވެރިންގެ ބޭނުންތައް ވެސް ފުއްދައިދީ ރަސްމީ އަދި ލޯކަލް މީޑިއާ ޕްލެޓްފޯމްތަކަށް މައުލޫމާތު ފޯރުކޮށްދިނުންކަމަށެވެ. އަދި މައްކާ އާއި މަދީނާގެ ތަންތަނުގެ ތެރޭގައި ހައްޖުވެރިން ދަތުރުކުރުމަށް މަގުފަހިކޮށްދީ މޫސުމާ ބެހޭ މައުލޫމާތާއި މޫސުމާ ބެހޭ ގޮތުން ދިމާވެދާނެ ކަންކަމުގެ މައުލޫމާތު ހިއްސާކުރުން ކަމަށެވެ.
މިއަހަރުގެ ހައްޖުގެ އަޅުކަން ޖޫން 14 ގައި ފެށޭއިރު ގިނަ ގައުމުތަކުން ހައްޖުގެ އަޅުކަން އަދާކުރުމަށް މީހުން ވަނީ ސައުދީއަށް ދަތުރުކުރަން ފަށާފައެވެ.
