ކުރިއަށް އޮތް ދުވަސްތަކަކީ ހައްޖާޖީން ފުރުމަށް ހަމަޖެހިފައިވާ ދުވަސްތަކެއް ކަމުން ވެލާނާ އިންޓަނޭޝަނަލް އެއާޕޯޓުގެ ޓްރެފިކް ފްލޯ ބެލެހެއްޓުމަށް އިތުރު ފުލުހުން ހަރަކާތްތެރިވަމުންދާނެ ކަމަށް އެ އިދާރާއިން ބުނެފިއެވެ.
ފުލުހުން ބުނީ ހައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރުމަށް ހަމަޖެހިފައިވާ ހައްޖުވެރިން މާދަމާ އާއި ޖޫން 3، 7، އަދި 10 ވަނަ ދުވަހު ފުރުމަށް ހަމަޖެހިފައިވާތީ އެ ދުވަސްތަކުގައި އެއާޕޯޓުގައި ޓްރެފިކް ތޮއްޖެހުން ބޮޑުވާނެ ކަމަށް ބެލެވޭ ކަމަށެވެ. އެހެންކަމުން އޮމާންކަމާއެކު ޓްރެފިކް ފްލޯ ކުރިއަށް ގެންދިޔުމަށް އެ ދުވަސްތަކުގައި އިތުރު ފުލުހުން އެއާޕޯޓުގައި ހަރަކާތްތެރިވާނެ ކަމަށް ފުލުހުން ބުންޏެވެ.
އަދި އެއާޕޯޓުން ފުރާ އެހެން މީހުންނަށް ވެސް ޓްރެފިކް ތޮއްޖެހުމުގެ ސަބަބުން ލަސްތަކެއް ކުރިމަތިވުމަކީ އެކަށީގެންވާ ކަމެއްކަން ފާހަގަކޮށް އެ ދުވަސްތަކުގައި ހުރިހާ ފަރާތްތަކުންވެސް ދުރާލައި އެއާރޕޯޓަށް ގޮސް ފުރުމުގެ އިންތިޒާމުތައް ނިންމުމަށް ފުލުހުން ވަނީ އިލްތިމާސްކޮށްފައެވެ.
ރާއްޖޭގެ ހާޖީންގެ ކަންކަން ބެލެހެއްޓުމަށް ސަރުކާރުގެ ފަރާތުން ހަރަކާތްތެރިވާ ހައްޖު މިޝަން އިން ބުނީ ހައްޖާޖީންގެ ފުރަތަމް ގްރޫޕް މާދަމާ ސައުދީ އަރަބިއްޔާ އަށް ފުރާނެ ކަމަށެވެ. އެ ގްރޫޕްގައި ޖުމްލަ 298 ހައްޖާޖީން ފުރުމަށް ހަމަޖެހިފައިވާ ކަމަށެވެ. އަދި ދެވަނަ ގުރޫޕް އަންނަ މަހުގެ 3 ވަނަ ދުވަހު 353 ހައްޖާޖީންނާއެކު ފުުރުމަށް ހަމަޖެހިފައިވާއިރު ތިންވަނަ ގުރޫޕު ފުރުމަށް ހަމަޖެހިފައިވަނީ ޖޫން 7 ވަނަ ދުވަހު 339 ހައްޖާޖީންނާ އެކު ކަމަށެވެ.
ހައްޖާޖީންގެ އިންތިޒާމްތައް ރަސްމީ ގޮތެއްގައި ބެލެހެއްޓުމުގެ ގޮތުން އެކުލަވާލި ހައްޖު މިޝަންގައި 7 މެންބަރުން އެކުލެެވެއެވެ. އޭގެ ތެރޭގައި ޑޮކްޓަރަކާއި މިނިސްޓްރީގެ މީޑިއާ ހިމެނެއެވެ.
މިއަހަރުގެ ހައްޖުގެ މަތިވެރި އަޅުކަމަށް ރާއްޖެއިން 1000 މީހުން ހައްޖުގެ އަޅުކަމަށް ފުރާނެއެވެ. ސައުދީ އަރަބިއްޔާއިން ރާއްޖެއަށް ދޭ 1،000 ހައްޖު ކޯޓާ މިފަހަރު ސަރުކާރުން ދީފައި ވަނީ ހައްޖު ކޯޕަރޭޝަން އަށް އެކަނިއެވެ.
އެގޮތަށް ނިންމާފައިވަނީ ވަރަށް ގިނަ ޖަމާއަތްތަކުން މީހުން އަތުން ފައިސާނެގުމަށްފަހު ހައްޖަށް ނުދެވުމުގެ މައްސަލަތަކުގެ އިތުރުން ބިޑް އުސޫލުން ކޯޓާ ނެގުމަށްފަހު، ކޯޓާ ބޮޑު އަގުގައި ވިއްކާ މައްސަލައަށް ހައްލު ހޯދައި ދިނުމުގެ ގޮތުން ކަމަށް އިސްލާމިން މިނިސްޓަރު ޝަހީމް ވަނީ ވިދާޅުވެފައެވެ.
