ރ. އުނގޫފާރު މަގުމަތީގައި ކުޅެން އުޅުނު ދެ ކުއްޖަކު ކަރަންޓުގައި ޖެހިގެން، ސަލާމަތް ކުރަން އުޅުނު ޒުވާނާގެ ހާލު ސީރިއަސް ކަމަށް ރީޖަނަލް ހޮސްޕިޓަލުން ބުނެފިއެވެ.
"ދަ ޕްރެސް" އަށް މައުލޫމާތު ދެމުން އުނގޫފާރު ހޮސްޕިޓަލުގެ ސީނިއާ ކަސްޓަމާ ރިލޭޝަން އޮފިސަރު ހަސަން ފަޒީލް ވިދާޅުވީ ކަރަންޓުގައި ޖެހުނު ދެ ކުއްޖަކާއި ޒުވާނަކު އެ ހޮސްޕިޓަލަށް ގެންގޮސްފައި ވަނީ މިއަދު މެންދުރުފަހު 1:40 ހާއިރު ކަމަށާއި އެއީ 12 އަހަރުގެ އަންހެން ކުއްޖަކާއި 8 އަހަރުގެ ފިރިހެން ކުއްޖެއްގެ އިތުރުން 18 އަހަރުގެ ފިރިހެނެއް ކަމަށެވެ.
18 އަހަރުގެ ޒުވާނާއަކީ 8 އަހަރުގެ ކުއްޖާ ސަލާމަތްކުރަން މަސައްކަތް ކުރި ޒުވާނާ ކަމަށް ފަޒީލް ވަނީ ވިދާޅުވިއެވެ.
ފަޒީލް ވިދާޅުވީ އެ ދެ ކުދިންނާއި ޒުވާނާއަށް ފަރުވާދެމުން ދަނީ އީއާރުގައި ކަމަށާއި ޒުވާނާގެ ހާލު ސީރިއަސް ކަމަށެވެ.
އެކަމުގެ މައުލޫމާތު އެނގޭ މީހަކު "ދަ ޕްރެސް" އަށް މައުލޫމާތު ދެމުން ބުނީ އެ ހާދިސާ ހިނގާފައި ވަނީ ވިއްސާރަވެގެން ބައްތިއަށް ކަރަންޓް އައިސްފައި ހުރުމުން ކަމަށެވެ.
ފަޒީލު ވިދާޅުވީ އެ މަގު ބައްތި އަކީ ބޭނުންކޮށްފައި ބޭނުން ނުކުރަން ވެގެން ދޫކޮށްލާފައި ހުރި ބައްތިއެއް ކަމަށާއި ފަހުން ހެދި މަގުތައް ހެދިއިރު އާ ކުރަން ވެގެން ދޫކޮށްލާފައި ހުރި ބައްތިއެއް ކަމަށެވެ. އަދި ބަންތިން ކަރަންޓް ފެންކޯރަށް އަރާފައިވާ ކަމަށް ފަޒީލް ވިދާޅުވިއެވެ.
