ރ. އުނގޫފާރު ހޮސްޕިޓަލުގައި އެމްއާރުއައިގެ ހިދުމަތް ދޭން ފަށައިފިއެވެ.
އުނގޫފާރު ހޮސްޕިޓަލުގައި އެމްއާރުއައިގެ ހިދުމަތް ރޭ ފަށްޓަވައިދެއްވީ ހެލްތު މިނިސްޓަރު ޑރ. އަބްދުﷲ ނާޒިމް އިބްރާހީމެވެ. އޭނާ ވިދާޅުވީ:
- އުނގޫފާރު ހޮސްޕިޓަލުގައި އެމްއާރުއައިގެ ހިދުމަތް ދޭން ފެށުމަކީ ޓާޝަރީ ފެންވަރަށް އެ ތަން ތަރައްގީކުރުމުގެ މަސައްކަތުގެ އެއްބައި ކަމަށް
- އެ ހޮސްޕިޓަލް ޓާޝަރީ ފެންވަރަށް ބަދަލުކުރެވިގެން ދާނެ ކަމަށް
ނާޒިމް އިތުރަށް ވިދާޅުވީ، އުނގޫފާރު ހޮސްޕިޓަލު ޓާޝަރީ ފެންވަރަށް ބަދަލުކުރުމަށް މިނިސްޓްރީން ކުރަން ޖެހޭ މަސައްކަތްތައް ބަލައި އެ ކަންކަން ބާރު ދުވެލީގައި ކުރަމުން ދާނެ ކަމަށެވެ.
އެމްއާރުއައިގެ އިތުރުން އުނގޫފާރު ހޮސްޕިޓަލުގައި ވަނީ ހުޅުތަކުގައި ރިއްސާ މީހުންނަށް ހާއްސަކޮށް ޕްލޭޓްލެޓް ޕްލާސްމާ ޓްރީޓްމަންޓް (ޕީއާރުޕީ)ގެ ހިދުމަތް ވެސް ފަށައިފައެވެ.
70 ހާހަށް ވުރެ ގިނަ މީހުން އަހަރަކު ހިދުމަތް ހޯދަމުންދާ އުނގޫފާރު ހޮސްޕިޓަލުގައި ލިބެން ހުންނަ ހިދުމަތްތަކުގެ ތެރޭގައި ސީޓީ ސްކޭންގެ ހިދުމަތާއި ލެޕަރޮސްކޯޕިކް ސާޖަރީ ހިމެނެއެވެ.
