ރ. އުނގޫފާރު މަގުމަތީގައި ކުޅެން އުޅުނު 2 ކުއްޖަކާއި ފިރިހެނަކު ކަރަންޓްގައި ޖެހި ރީޖަނަލް ހޮސްޕިޓަލްގައި ފަރުވާދޭމުންދާ ކަމަށް އެ ހޮސްޕިޓަލުން ބުނެފިއެވެ.
"ދަ ޕްރެސް" އަށް މައުލޫމާތު ދެމުން އުނގޫފާރު ހޮސްޕިޓަލުގެ ސީނިއާ ކަސްޓަމާ ރިލޭޝަން އޮފިސަރު ހަސަން ފަޒީލް ވިދާޅުވީ އެ 2 ކުދިންނައި ފިރިހެން މީހާ އެ ހޮސްޕިޓަލަށް ގެންދިޔައީ މިއަދު މެންދުރުފަހު 1:40 ހާއިރު ކަމަށެވެ. އަދި އެއީ 12 އަހަރުގެ އަންހެން ކުއްޖަކާއި 8 އަހަރުގެ ފިރިހެން ކުއްޖެއްގެ އިތުރުން 18 އަހަރުގެ ފިރިހެނެއް ކަމަށް ފަަޒީލް ވިދާޅުވިއެވެ.
ފަޒީލް ވިދާޅުވީ އެމީހުންނަށް ފަރުވާދެމުން ދަނީ އީއާރުގައި ކަމަށެވެ.
އެކަމުގެ މައުލޫމާތު އެނގޭ މީހަކު "ދަ ޕްރެސް" އަށް މައުލޫމާތު ދެމުން ބުނީ އުނގޫފާރު ޕާކު ސަރަހައްދުގެ މަގުމަތީގައި ކުޅެން އުޅުނު ދެ ކުއްޖަކާއި އެމީހާ ކަރަންޓްގައި ޖެހިފައި ވަނީ މަގު ބައްތީގެ ހޮޅީގައި ޖެހިގެން ކަމަށެވެ. އަދި އެ ހާދިސާ ހިނގާފައި ވަނީ ވިއްސާރަވެގެން ބައްތިއަށް ކަރަންޓް އައިސްފައި ހުރުމުން ކަމަށް އޭނާ ވަނީ ބުނެފައެވެ.
ފަޒީލު ވިދާޅުވީ އެ މަގު ބައްތި އަކީ ބޭނުންކޮށްފައި ބޭނުން ނުކުރަން ވެގެން ދޫކޮށްލާފައި ހުރި ބައްތިއެއް ކަމަށާއި ފަހުން ހެދި މަގުތައް ހެދިއިރު އާ ކުރަން ވެގެން ދޫކޮށްލާފައި ހުރި ބައްތިއެއް ކަމަށެވެ.
