އުނގޫފާރު މަގުމަތީގައި ކުޅެން އުޅުނު ދެ ކުއްޖަކު ކަރަންޓްގައި ޖެހި ރީޖަނަލް ހޮސްޕިޓަލްގައި ފަރުވާދޭން ފަށައިފިއެވެ.
އެކަމުގެ މައުލޫމާތު އެނގޭ މީހަކު "ދަ ޕްރެސް" އަށް މައުލޫމާތު ދެމުން ބުނީ އުނގޫފާރު ޕާކު ސަރަހައްދުގެ މަގުމަތީގައި ކުޅެންއުޅުނު ދެ ކުއްޖަކު ކަރަންޓްގައި ޖެހިފައިވަނީ މަގު ބައްތީގެ ހޮޅީގައި ޖެހިގެން ކަމަށެވެ. އަދި އެ ހާދިސާ ހިނގާފައިވަނީ ވިއްސާރަވެގެން ބައްތިއަށް ކަރަންޓް އަރައިގެން ކަމަށް އޭނާ ވަނީ ބުނެފައެވެ.
"ދަ ޕްރެސް" އަށް މައުލޫމާތު ދެމުން އުނގޫފާރު ހޮސްޕިޓަލުގެ ސީނިއާ ކަސްޓަމާ ރިލޭޝަން އޮފިސަރު ހަސަން ފަޒީލް ވިދާޅުވީ އެ ތިން ކުދިން އެ ހޮސްޕިޓަލަށް ގެންދިޔައީ މިއަދު މެންދުރުފަހު 1:40 ހާއިރު ކަމަށެވެ. އަދި އެއީ 12 އަހަރުގެ އަންހެން ކުއްޖަކާއި 8 އަހަރުގެ ފިރިހެން ކުއްޖެއްގެ އިތުރުން 18 އަހަރުގެ ފިރިހެން ކުއްޖެއް ކަމަށް ފަަޒީލް ވިދާޅުވިއެވެ.
ފަޒީލް ވިދާޅުވީ އެ ތިން ކުދިންނަށްވެސް ފަރުވާދެމުންދަނީ އީއާރުގައި ކަމަށެވެ.
ފަޒީލު ވިދާޅުވީ އެ މަގު ބައްތިއަކީ ބޭނުންކޮށްފައި ބޭނުން ނުކުރަންވެގެން ދޫކޮށްލާފައި ހުރި ބައްތިއެއް ކަމަށާއި ފަހުން ހެދި މަގުތައް ހެދިއިރު އާ ކުރަން ވެގެން ދޫކޮށްލާފައި ހުރި ބައްތިއެއް ކަމަށެވެ. އަދި އެ ބައްތިން ކަރަންޓް ފެންކޯރަށް އައިސްފައިވާ ކަމަށް ފަޒީލް ވިދާޅުވިއެވެ.
