ނިމިދިޔަ ސަރުކާރުން ކުރިއަށް ގެންދިޔަ ގެދޮރުވެރިންގެ ސްކީމްގެ ފުރަތަމަ ބުރުގައި އިއުލާން ކުރި 4000 ފްލެޓް މައްސަލައިގައި ޖިނާއީ ތަހުގީގެއް ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
4000 ފްލެޓް މައްސަލައާ ގުޅިގެން 'ދަ ޕްރެސް' އަށް މައުލޫމާތު ދެމުން އޭސީސީގެ އޮފިޝަލަކު ބުނީ، ފްލެޓް މައްސަލައިގައި އެންމެ ފުރަތަމަ ހިންގި ތަހުގީގަށް ފަހު ރިޕޯޓް ތައްޔާރުކޮށް ކޮންސްޓްރަކްޝަން މިނިސްޓްރީ އަށް ހަވާލު ކުރުމަށްފަހު، މިހާރު ފްލެޓް މައްސަލައާ ގުޅިގެން ޖިނާއި ތަހުގީގެއް ހިންގަމުން އަންނަ ކަމަށެވެ. އެ ތަހުގީގާ ބެހޭ ގޮތުން އިތުރު ތަފްސީލް މިވަގުތު ހާމަ ކުރެވެން ނެތް ކަމަށް އޭސީސީ އިން ބުނެއެވެ.
އޭސީސީން މި މައްސަލައިގެ އިތުރު ތަފްސީލެއް ދީފައި ނުވި ނަމަވެސް، އޭސީސީން ކުރިން ބެލި ފްލެޓް ލިސްޓުގެ މައްސަލައިގެ ތަހުގީގަށް ފަހު ވަނީ ދާއިމީ ލިސްޓުގައި ޝަރުތު ހަމަވެ އެއްވެސް މައްސަލައެއް ދިމާނުވާ ފޯމްތަކުގެ ލިސްޓެއް ހައުސިން މިނިސްޓްރީއާ ހަވާލުކޮށްފައެވެ.
މި މައުލޫމާތު އޭސީސީން އާންމު ކުރުމާ އެކު އެކްސްގައި ވަނީ "ހަސަން ކުރުސީ" ނަމުގައި ހިންގާ އެކައުންޓަކުން ފްލެޓު ނުލިބޭ މީހުންގެ ލިސްޓު ކަމަށް ބުނެ ސޯޝަލް މީޑިއާގައި ލިސްޓެއް އާންމު ކޮށްފައެވެ. މިއާ އެކު އޭސީސީން ވަނީ އެއީ ފޭކް ލިސްޓެއް ކަމަށް ބުނެ އެކަމާ ގުޅިގެން އިތުރަށް ބަލަންޖެހޭ ކަންކަން ބަލައި އަަޅަންޖެހޭ ފިޔަވަޅުތައް އަޅާނެ ކަމަށް ބުނެފައެވެ.
