ކ. ތިލަފުށިން ފުރައިގެން މ. މެދުފުށި އައިލެންޑް ރިސޯޓަށް ދަތުރުކުރަމުން ދިޔަ “އޭއޭއޭ 37” ނަމަކަށް ކިޔާ މުދާ އުފުލާ ދޯންޏާ ގުޅިއްޖެ ކަމަށް އެމްއެންޑީއެފް އިން ބުނެފިއެވެ.
އެކަމާ ގުޅިގެން އެމްއެންޑީއެފްއިން ބުނީ އެ ދޯންޏާ ގުޅިއްޖެ ކަމަށާއި ކޯސްޓްގާޑް ޝަހީދު އަލީ އެދިމާލައް ދުއްވަމުންދާ ކަމަށެވެ.
ހުކުރު ދުވަހުގެ އިރުއޮއްސި 6 ޖަހާ ހާއިރު ކ. ތިލަފުށިން 3 މީހުންނާއެކު ފުރި އެ ދޯނީގެ ހަބަރެއް ނުވެގެން، އެކަމުގެ މައުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރު (އެމްއާރުސީސީ) އަށް ލިބިފައި ވަނީ އެ ދުވަހުގެ 5:20 ހާއިރުއެވެ. އެ ވަގުތުން ފެށިގެން އެމްއެންޑީއެފް އިން އެ ދޯނި ހޯދުމުގެ މަސައްކަތް ފެށިއިރު ކޯސްޓުގާޑުގެ އިތުރުން މޯލްޑިވިއަންގެ ބޯޓެއްވެސް އެ މަސައްކަތުގައި ބައިވެރިވިއެވެ.
އެ ދޯނިން ދަތުރުކުރީ ތިން ބިދޭސީއަކާއި ދިވެއްސެކެވެ.
މި ދުވަސްވަރަކީ މުޅި ރާއްޖެއަށްވެސް ވިއްސާރަ ދުވަސްވަރެއްކުމުން މޫސުމާ ބެހޭ ގައުމީ އިދާރާއިން ވަނީ ކުރިއަށް އޮތް ތިން ދުވަހަށް، ގުގުރުމާއެކު ބޯކޮށް ވާރޭ ވެހޭނޭކަމަށް ލަފާކޮށް، ރާއްޖޭގެ ބޮޑު ބަޔަކަށް ރީނދޫ ސަމާލު ނެރެފައެވެ. އަދި ހާއްސަކޮށް މުޅި ރާއްޖެއަށް ވައިގަދަވެ، ކަނޑުތައް ގަދަވާނެކަމަށް ލަފާކޮށްފައިވާތީ، ކަނޑު ދަތުރުކުރާ ފަރާތްތަކުން މޫސުމަށް ސަމާލުކަން ދިނުމަށް މެޓް އޮފީހުން ވަނީ އިލްތިމާސްކޮށްފައެވެ.
މީގެއިތުރުން އެމްއެންޑީއެފް ކޯސްޓްގާޑުންވަނީ ކަނޑުމަގުން ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށާއި، ކޮންމެހެން ދަތުރުކުރަންޖެހޭ ފަރާތްތަކުން ވެސް، ދަތުރުކުރާއިރު މޫސުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. އަދި، ރޭގަނޑު ދަތުރުނުކުރުމަށާއި، މޫސުން ތަން ނުދޭނަމަ މޫސުން ރަނގަޅު ވާންދެކަށް ދަތުރު ފަސްކޮށްލުމަށް ވެސް އެމްއެންޑީއެފް ކޯސްޓްގާޑުން ވަނީ އިލްތިމާސްކޮށްފައެވެ.
