ރައްޔިތުންގެ އިންތިހާބުގައި ވާދަކުރި ކެންޑިޑޭޓުންގެ ތެރެއިން 333 ކެންޑިޑޭޓުންގެ މާލީ ބަޔާން އަދި ހުޅަހަޅާފައިނުވާކަަމަށް އިލެކްޝަން ކޮމިޝަނުން ބުނެފިއެވެ.
އީސީ އިން ބުނީ މިދިޔަ ބުރާސްފަތީގެ ނިޔަލަށް 35 ކެންޑިޑޭޓުން މާލީ ބަޔާން ހުށަހަޅާފައިވާ ކަމަށާއި މާލީ ބަޔާން ހުށަހެޅުމުގެ މުއްދަތު މި މަހުގެ 22 ވަނަ ދުވަހަކަށް ހަމަވާނެކަމަށެވެ. މީގެ އިތުރުން އީސީ އިން ބުނީ ކެންޑިޑޭޓުން މާލީ ބަޔާން ހުށަހަޅަން ޖެހޭ މުއްދަތުގައި ހުށަނާޅައިފިނަމަ، ގާނޫނުގައި ބުނާ ގޮތަށް އެ މެންބަރުންނަށް ފިޔަވަޅު އެޅުމަށް ޕްރޮސެކިއުޓާ ޖެނެރަލް (ޕީޖީ) އަށް ފޮނުވާނެ ކަމަށެވެ.
ރައްޔިތުންގެ މަޖިލީހުގެ ނައިބު ރައީސް އިސްމާއީލް ހަބީބު ވިދާޅުވީ ރައްޔިތުންގެ މަޖިލީހަށް ކުރިމަތިލެއްވި ކެންޑިޑޭޓުންގެ މާލީ ބަޔާން، އެ ކެންޑިޑޭޓަކު އިންތިހާބުވިޔަސް، ނުވަތަ އިންތިހާބު ކާމިޔާބުނުކުރެވުނު ނަމަވެސް، އީސީއަށް ހުށަހަޅަންޖެހޭނެ ކަަމެށެވެ. އަދި މާލީ ބަޔާން ހުށަނާޅައިފިނަމަ، ނުވަތަ މާލީ ބަޔާނުގައި ދޮގު މައުލޫމާތެއް ދީފައިވާނަމަ އެ ކެންޑިޑޭޓެއްގެ އަދަބަކީ، އެއް އަހަރުދުވަހުގެ މުއްދަތަށް ޖަލަށްލުން ނުވަތަ 72،000.00 ރުފިޔާއިން ޖޫރިމަނާ ކުރުން ކަަމށެވެ.
މީގެ އިތުރުން އިސްމާއީލް ހަބީބް ވިދާޅުވީ ބޭންކް ސްޓޭޓްމަންޓްގައި ހުރި ހުރިހާ މުއާމަލާތަކާ ގުޅޭ ހުރިހާ ބިލެއް މާލީ ބަޔާނާއެކީ ހުށަހަޅަންޖެހޭނެކަމަށެވެ. އަދި ފައިސާގެ މުއާމަލާތްތައް ހުންނަންޖެހެނީ އެކައުންޓުގެ ތެރެއިން ކުރެވިފައިވާކަން ފާހަގަކޮށް އިސްމާއީލް ހަބީބް ވިދާޅުވީ ކުރެވިފައިވާ ކޮންމެ މުއާމަލާތަކާ ގުޅިގެން ބިލެއް އޮންނަންޖެހޭނެކަމަށެވެ. އިތުރަށް އިސްމާއީލް ހަބީބު ވިދާޅުވީ މިހާރު މާލީ ބަޔާން އޮޑިޓްފާމަކުން ޗެކްކުރުން ލާޒިމު ނޫންކަމަށެވެ.
