މި އަހަރު ރާއްޖޭގައި ބޭއްވުމަށް ހަމަޖެހިފައިވާ އެއާ ސާވިސް ވޯލްޑް ކޮންގްރެސް (އޭއެސްޑަބްލިއުސީ) 2024ގެ ޕާޓްނަރުން އިއުލާނު ކޮށްފިއެވެ.
އޭއެސްޑަބްލިއުސީގެ ޕާޓްނަރުން އިއުލާނުކޮށްފައި ވަނީ ވެލާނާ އިންޓަނޭޝަނަލް (ވީއައިއޭ)ގެ ނޫވިލު ސީޕްލޭން ޓާމިނަލްގައި އެކަމަށްޓަކައި ހާއްސަ ރަސްމިއްޔާތެއްގައެވެ.
މި ރަސްމިއްޔާތުގައި ވާހަކަ ދައްކަވަމުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ އެއާ ސާވިސް ވޯލްޑް ކޮންގްރެސްއާއެކު ނެޓްވޯކިން އަދި ވިޔަފާރީގެ ތަފާތު ފުރުސަތުތައް ފަހިވެގެންދާނެ ކަމަށެވެ. އަދި ހުރިހާ ސްޓޭކްހޯލްޑަރުން ވެސް މި ފުރުސަތުގެ ބޭނުން ހިފާ، ދެމެހެއްޓެނިވި ވިޔަފާރީގެ ގުޅުންތައް ގާއިމް ކުރުމަށް އޭނާ ވަނީ ގޮވާލައްވާފައެވެ.
އެއާ ސާވިސް ވޯލްޑް ކޮންގްރެސް 2024ގެ ޕާޓްނަރުން:
- ރިސޯޓް ޕާޓްނަރުން: ޝެރެޓަން، މަލާހިނި
- ވެނިއު ޕާޓްނާ: ކުރުނބާ މޯލްޑިވްސް
- ޑިޖިޓަލް ޕާޓްނާ: ދިރާގު
- ސީޕްލޭން ޕާޓްނާ: ޓީއެމްއޭ
- އެއާލައިން ޕާޓްނާ: އެމިރޭޓްސް
- އޭވިއޭޝަން ޕާޓްނާ: މޯލްޑިވިއަން
- މީޑިއާ ޕާޓްނަރުން: އައިލެންޑް ޗީފް، އޯކާ މީޑިއާ، ހޮޓެލިއާ މޯލްޑިވްސް، ދަ އެރައިވަލް، ޓްރެވަލޫޝަން މީޑިއާ
އެއާ ސާވިސް ވޯލްޑް ކޮންގްރެސްގެ އެންޑޯސްމަންޓް ޕާޓްނަރުން:
- މިނިސްޓްރީ އޮފް ޓޫރިޒަމް
- މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
- މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ
- މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް
މި ރަސްމިއްޔާތުގައި ވާހަކަ ދައްކަވަމުން އެމްއެމްޕީއާރްސީގެ ޗެއާޕާސަން އައިޝާ ނޫރައިން ޖަނާހް ވިދާޅުވީ މި ކޮންގްރެސްއާއެކު ރާއްޖޭގެ ޕާޓްނާޝިޕްތައް އިތުރު ކުރުމުގެ ފުރުސަތުތައް ލިބިގެންދާނެ ކަމަށެވެ. އަދި ރާއްޖޭގެ ނެޓްވޯކްތައް އިތުރަށް ފުޅާވެ، ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް ނޫރައިން ވިދާޅުވިއެވެ.
އެއާ ސާވިސް ކޮންގްރެސް 2024 އަކީ ރާއްޖޭގައި ބާއްވާ އޭވިއޭޝަން ރޫޓް ޑިވެލޮޕްމެންޓްގެ ފުރަތަމަ އިވެންޓެވެ. މި އިވެންޓުގައި އޭވިއޭޝަން ދާއިރާގެ މުސްތަގުބަލާމެދު މަޝްވަރާ ކުރުމަށް ހަމަޖެހިފައި ވާއިރު، މި އިވެންޓު ކުރިއަށް ގެންދިއުމަށް ހަމަޖެހިފައި ވަނީ ޖުލައި މަހުގެ 9 ވަނަ ދުވަހުން ފެށިގެން 11 ވަނަ ދުވަހަށް ކުރުނބާ މޯލްޑިވްސްގައެވެ.
މި އިވެންޓުގައި ދުނިޔޭގެ އެކި ކަންކޮޅުތަކުން 300 އެއްހާ މީހުން ބައިވެރިވާނެ ކަމަށް އެމްއޭސީއެލްއިން ލަފާ ކުރެއެވެ. އޭގެތެރޭގައި އެއާޕޯޓް އެންޑް ރޫޓް ޑިވެލޮޕްމަންޓް އެގްޒެކެޓިވްސް، އެއާލައިން އެގްޒެކެޓިވްސް، އެއާލައިން ނެޓްވޯކިން ޕްލޭނަރުން، އޭވިއޭޝަން ސަޕްލަޔަރުންގެ އިތުރުން އޭވިއޭޝަން އަދި ޓޫރިޒަމް ބޮޑީގެ މަންދޫބުން ހިމެނޭ ކަމަށް އެމްއޭސީއެލްއިން ބުނެއެވެ.
