ރާއްޖެއާއެކު ތަރައްގީގެ މަޝްރޫއުތައް ދަނީ ރަނގަޅަށް ކަމަށް އިންޑިޔާގެ ހާރިޖީ ވަޒީރު ޑރ. ސުބްރަމާނިޔަމް ޖައިޝަންކަރް ވިދާޅުވެއްޖެއެވެ.
ޖައިޝަންކަރު މިހެން ވިދާޅުވެފައި ވަނީ ކޮންފެޑަރޭޝަން އޮފް އިންޑިއާ އިންޑަސްޓްރީ (ސީއައިއައި) ވިޔަފާރި ސަމިޓްގައި ވާހަކަ ދައްކަވަމުންނެވެ.
ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޖައިޝަންކަރު ވިދާޅުވީ ރާއްޖެއާއެކު ތަރައްގީގެ މަޝްރޫއުތައް ވަރަށް ރަނގަޅަށް ކުރިއަށްދާ ކަމަށެވެ. އަދި ސިޔާސީ ހަލަބޮލިކަމެއް އޮތްނަމަވެސް ދެގައުމުގެ ދެމެދުގައި އޮތް ނުތަނަވަސްކަން ނައްތާލުމަށް ދެ ގައުމުންވެސް މަސައްކަތް ކުރަމުންދާ ކަމަށް އޭނާ ވަނީ ވިދާޅުވެފައެވެ.
އިންޑިއާ އާއި ރާއްޖޭގެ ގުޅުން މިއަހަރު ކުރީކޮޅު ގޯސްވެފައި ވާއިރު އޭގެ ސަބަބަކަށް ވެފައި ވަނީ އިންޑިއާގެ ބޮޑުވަޒީރު ނަރެންދުރާ މޯދީ، އެ ގައުމުގެ ސަރަހައްދުގައިވާ ލަކްޝަދީބުގެ ރަށްރަށަށް ވަޑައިގެން އެ ރަށްރަށުގެ ރީތިކަމާއި އެ ތަންތަނުގައި ދިރިއުޅޭ މީހުންގެ މެހެމާންދާރީ އަށް ތައުރީފު ކުރައްވައި 'އެކްސް' ގައި ކުރެއްވި ޕޯސްޓަކަށް މަރުހަބާ ކިޔައި ކުރި ރީޕޯސްޓެއްގައި އިންޑިއާގެ މީހަކު މިކަމުގެ ސަބަބުން ލަކްޝަދީބަށް އަންނަ ފަތުރުވެރިން އިތުރުވެ، ރާއްޖޭގެ ފަތުރުވެރިކަން ދަށަށް ދިއުން އެކަށީގެންވާ ކަމަށް ބުނުމުންނެވެ.
އެގޮތުން މި ޕޯސްޓަށް ރައްދު ދެއްވައި، ޔޫތު މިނިސްޓްރީގެ 3 ނައިބުން ކަމަށްވާ މަރިޔަމް ޝިއުނާ އާއި މަލްޝާ ޝަރީފްގެ އިތުރުން އަބްދުﷲ މަހްޒޫމް މާޖިދު ވަނީ މޯދީ އަށް ބޭއަދަބީ ބަހުން މުހާތަބުކޮށް ޕޯސްޓު ކޮށްފައެވެ. މިކަމާ ގުޅިގެން އިންޑިއާގެ ގިނަ ރައްޔިތުންގެ ނުރުހުން ޝިއުނާ އާއި މަލްޝާ އަށް އަމާޒުވުމުގެ އިތުރުން، ރާއްޖެއަށާއި ދިވެހި ސަރުކާރަށް ބޮޑެތި ފާޑުކިއުންތައްވެސް ވަނީ އަމާޒުވެފައެވެ. މި މައްސަލަ އާ ގުޅިގެން ޝިއުނާ އާއި މަލްޝާ ގެ އިތުރުން މާޖިދުވެސް ވަނީ ސަސްޕެންޑު ކޮށްފައެވެ.
އެ މައްސަލައަށް ފަހު ދާދިފަހުން، މި މަހުގެ 9 ވަނަ ދުވަހު ރާއްޖޭގެ ފޮރިން މިނިސްޓަރު މޫސާ ޒަމީރު ވަނީ އިންޑިއާގެ ހާރިޖީ ވަޒީރު ސުބްރަމާނިޔަމް ޖައިޝަންކަރާ ބައްދަލު ކުރައްވައި ދެގައުމުގެ ދެމެދުގައި އޮތް ގުޅުންތަކާ ބެހޭ ގޮތުން ފުޅާދާއިރާއެއްގައި މަޝްވަރާ ކުރައްވައި ގުޅުންތައް އިތުރަށް ހަރުދަނާ ކުރުމާ ގުޅޭގޮތުން ވާހަކަ ދައްކަވާފައެވެ.
ބައްދަލުވުމާ ގުޅޭ ގޮތުން ޖައިޝަންކަރު ކުރެއްވި ޓްވީޓެއްގައި ވިދާޅުވީ، ގާތް ރަހުމަތްތެރި ދެގައުމުގެ ހައިސިއްޔަތުން ގުޅުންތަކާއި އަދި ތަރައްގީގެ ރޮނގުގައި ކުރިއަށް ދާނީ ދެގައުމުގެ މަސްލަހަތާ އެއްގޮތަށް ކަމަށެވެ.
އަދި ހަމައެހެންމެ އިންޑިއާ އަކީ ރާއްޖޭގެ ތަރައްގީގައި މުހިންމު ދައުރެއް އަދާ ކުރާ އަދި އެހީތެރިކަން ފޯރު ކޮށްދޭ ގައުމެއް ކަމަށާއި ރާއްޖޭގައި އިންޑިއާ އިން ހިންގި އަދި ހިންގާ ޕްރޮޖެކްޓުތަކުން ރާއްޖޭގެ ރައްޔިތުންނަށް ފައިދާ ކޮށްފައި ވާ ކަމަށް ޖައިޝަންކަރު ވިދާޅުވިއެވެ. މީގެ އިތުރުން އިންޑިއާ އިން ރާއްޖެއަށް އެކަށީގެންވާ ލުއި ގޮތްތަކެއްގައި މާލީ އެހީތެރިކަން ވެސް ފޯރުކޮށް ދީފައި ވާ ކަމަށް ޖައިޝަންކަރު ވިދާޅުވިއެވެ.
