ރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒު މިއަދު އިންޑިއާއަށް ވަޑައިގަތުމާއެކު އެ ގައުމުގެ ހާރިޖީ ވަޒީރު ޑރ. ސުބްރަމާނިއަމް ޖައިޝަންކަރު އެމަނިކުފާނާ ބައްދަލުކުރައްވައިފިއެވެ.
މި ބައްދަލުކުރުމާ ގުޅިގެން ރައިސްއޮފީހުން ބުނީ އިންޑިއާ އާއި ރާއްޖޭގެ މަސްލަހަތު ހިމެނޭ ގިނަ ކަންކަމަށް އެ ބައްދަލުވުމުގައި މަޝްވަރާ ކުރެވުނު ކަމަށެވެ.
މި ބައްދަލުވުމާ ގުޅޭގޮތުން ޖައިޝަންކަރު ވިދާޅުވީ ރައީސް އިންޑިއާއަށް ވަޑައިގަތުމުން ދައްކައިދެނީ ދެގައުމުގެ ގުޅުން ބަދަހިކުރުމަށް ރައީސް އަހަންމިއްޔަތުކަން ދެއްވާ މިންވަރު ކަމަށާއި މާދަމާ އޮންނަ ދެގައުމުގެ ވެރިންގެ ބައްފަލުވުމާއެކު ދެގައުމުގެ ގުޅުމުގެ އާ ސޮފްހަައެއް ފެށިގެން ދާނެ ކަމަށެވެ.
ފާހަގަކޮށްލެވޭ ގޮތުގައި މިދިޔަ އޮގަސްޓު މަހު ޖައިޝަންކަރު ވަނީ 3 ދުވަހުގެ ރަސްމީ ދަތުރެއްގައި ރާއްޖެ ވަޑައިގެންފައެވެ. މި ދަތުރުގައި އިންޑިއާގެ އެހީގައި ރާއްޖޭގައި ހިންގަމުން ދާ ބައެއް މަޝްރޫތަކުގެ ނިމުން ފާހަގަ ކޮށް އާ އެއްބަސްވުންތަކެއްގައި ވަނީ ސޮއިކޮށްފައެވެ. ޖައިޝަންކަރުގެ އެ ދަތުރުގައި ރައީސް މުއިއްޒު ކިޔުއްވި ހޫނު މަރުހަބާ އަށާއި ބެހެއްޓެވި ގާތްކަމަށް ރައީސަށް ޖައިޝަންކަރު ވަނީ ޝުކުރު އަދާކުރައްވާފައެވެ.
ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވާ މި ދަތުރުފުޅަކީ މިއަދުން ފެށިގެން މި މަހުގެ 10 ވަނަ ދުވަހަށް، އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ.
ރައީސްގެ މި ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ، އިންޑިއާގެ ބޮޑު ވަޒީރު ނަރެންދްރަ މޯދީ، އަދި އެ ގައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ. މިއީ މިދިޔަ ނޮވެމްބަރު މަހު ރައީސް މުއިއްޒު، މަގާމާ ހަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ފުރަމާނަ ދަތުރުފުޅެވެ.
