ރާއްޖޭގެ ހާއްސަ އިކޮނޮމިކް ޒޯންތައް ތަރައްގީ ކުރުމަށް އިކޮނޮމިކް މިނިސްޓްރީއިން ޔުނައިޓެޑް އަރަބި އެމިރޭޓްސް (ޔޫއޭއީގެ) އިންޓަނޭޝަނަލް ފުރީ ޒޯން އޮތޯރިޓީ (އިފްޒާ)އާއެކު އެމްއޯޔޫގައި ސޮއިކޮށްފި އެވެ.
އިހަވަންދިއްޕޮޅުގައި ތަރައްގީ ކުރާ މޯލްޑިވްސް އިކޮނޮމިކް ގޭޓްވޭ އަދި ކ. ފުނަދޫގައި ގާއިމް ކުރާ ސްޕެޝަން އިކޮނޮމިކް އެންޑް ފައިނޭންޝަލް ސާވިސް ޒޯނު ތަރައްގީ ކުރުމަށް އެމްއޯޔޫއެއްގައި ސޮއުކޮށްފައި ވަނީ މިއަދު މީރުމާގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގައެވެ.
މި ރަސްމިއްޔާތުގައި ވާހަކަ ދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ކުރިއަށް އޮތް 4 ނުވަތަ 5 މަހުގެ ތެރޭގައި އިފްޒާއާއެކު އެއްބަސްވުމަކަށް އާދެވޭނެ ކަމަށެވެ. އަދި އެއްބަސްވުމުގެ ތެރެއިން އުތުރާއި ފުނަދޫގެ ފައިނޭންޝަލް ސެންޓާ ގާއިމް ކުރުމުގެ މަސައްކަތް ކުރިއަށް ގެންދެވޭނެ ކަމަށެވެ.
އެ އެއްބަސްވުމުގެ ދަށުން އެއާޕޯޓާ މާލެއާ ގުޅުވާލެވޭނެ ކަމަށާއި މި އަހަރު ތެރޭގައި އެ ޕްރޮޖެކްޓް ފެށުމަށް މަސައްކަތް ކުރަމުންދާ ކަމަށް ސައީދު ވިދާޅުވިއެވެ. އަދި މާލެއާއި ހުޅުލެ ބްރިޖަކުން ގުޅާލުމުގެ މަސައްކަތް ކުރާނީ އިފްޒާގެ ހަރަދުގައި ކަމަށް ވެސް ސައީދު ވަނީ ވިދާޅުވެފައެވެ.
ސައީދު އިތުރަށް ވިދާޅުވީ އެއްބަސްވުމުގެ ތެރެއިން އިފްޒާގެ ތަޖުރިބާ ބޭނުންކޮށްގެން އިންވެސްޓަރުން ގެނައުމުގެ މަސައްކަތް ކުރާނެ ކަމަށެވެ. ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރު ސައީދުއެވެ. އަދި އިފްޒާ ކުންފުނީގެ ފަރާތުން ސޮއިކުރެއްވީ އެކުންފުނީގެ ޗެއާމަން މާޓިން ގްރެގާސް ޕެޑެސެންއެވެ.
