ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރަން މާދަމާ ހާއްސަ އޮޕަރޭޝަނެއް ފެށުމަށް ނިންމައިފިއެވެ.
މިނިސްޓްރީ އޮފް ހޯމްލޭންޑް އެންޑް ސެކިއުރިޓީ އާއި އިމިގްރޭޝަން ގުޅިގެން ހިންގުމަށް ހަމަޖެހިފައިވާ ހާއްސަ އޮޕަރޭޝަން ފެށުމަށް ހަމަޖެހިފައިވަނީ ކ. ހިންމަފުށީގައެވެ.
"އޮޕަރޭޝަން ކުރަނގި" ގެ ނަމުގައި ހިންގާ މި ހާއްސަ އޮޕަރޭޝަން އަކީ ގަވާއިދާ ހިލާފަށް ރާއްޖޭގައި ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމުގެ ގައުމީ ހަރަކާތުގެ ދަށުން ކުރިއަށްގެންދާ އޮޕަރޭޝަނެކެވެ. މި އޮޕްރޭޝަނުގައި ބިދޭސީންގެ ފިންގަ ޕްރިންޓް ނެގުމުގެ މަސައްކަތް ކުރުމަށް ވަނީ ހަމަޖެހިފައެވެ.
ހުރިހާ ބިދޭސީންގެ ފިންގަ ޕްރިންޓް ނެގުމުން އިނގިލި ޖައްސާ އެއީ ކާކުތޯ ދެނެގަނެވޭނެއެވެ. އަދި ހަމައެހެންމެ ރަށްރަށުގައި އުޅޭ ބިދޭސީންގެ ތެރެއިން ފުރައިގެން ދަނީ ކޮން ބައެއްތޯ އަދި އަނބުރާ އަންނަނީ ކޮންބައެއްތޯ ވެސް ދެނެގަނެވޭނެ ކަމަށް ހޯމް މިނިސްޓަރު ވިދާޅުވެފައި ވެއެވެ.
މަސައްކަތްތެރިންގެ ދުވަހުގެ މުނާސަބާގައި މިއަދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވި ހާއްސަ ހިތޯބުގައި ވިދާޅުވީ، ގަވާއިދާ ހިލާފަށް އުޅޭ ބިދޭސީން 48 ގަޑީރުތެރޭ ބޭރުކުރުމުގެ މަސައްކަތް ފައްޓަވާފައިވާކަމަށެވެ.
ރާއްޖޭގައި ހެދިފައިވާ ގަވާއިދުތަކާއި ހިލާފަށް ރާއްޖެ އެތެރެވެ ރާއްޖޭގައި އެކި ކަހަލަ މަސައްކަތް ކުރަމުންދާ ބިދޭސީން ގިނަވެފައިވަނީ އެތައް ވެރިކަމެއްގައި އެކަމަށް އިހުމާލުވުމުންކަމަށް ފާހަގަ ކުރައްވާ ރައިސް އިތުރަށް ވިދާޅުވީ، އެފަދަ ކަންކަން ހުއްޓުވުމަށްޓަކައި ގަވާއިދާ ހިލާފަށް ބިދޭސީ މަސައްކަތްތެރިން ރާއްޖޭގައި ތިބުމަށް ހުޅުވިފައިވާ މަގުތަށް ބަންދުކުރުމަކީ ނުކުރެވޭނެ ކަމެއް ނޫން ކަމަށެވެ.
މި ސަރުކާރުގެ އަމާޒަކީ އެއް އަހަރު ދުވަސްތެރޭގައި ރާއްޖޭގައި ތިބި ހުރިހާ ބިދޭސީން ގާނޫނީ އިމުގެ ތެރެއަށް ވެއްދިފައިތިބި މީހުންކަން ކަށަވަރު ކުރުމެވެ. ގަވާއިދާ ހިލާފަށް ރާއްޖެއަށް ބިދޭސީން އެތެރެވުމުގެ މައްސަލައަކީ ދެހާހުގެ ފަހުކޮޅުން ފެށިގެން ބޮޑުވެފައިވާ މައްސަލައެެކެވެ. އެ މައްސަލައަށް ހައްލު ހޯދުމަށްޓަކައި މީގެ ކުރީގެ އެކި ސަރުކާރުތަކުން ވެސް ބުރަ މަަސައްކަތްތަކެއް ކޮށްފައިވެ އެވެ.
އެގޮތުން މިދިޔަ ސަރުކާރުން ވަނީ ގަވާއިދާ ހިލާފަށް ރާއްޖޭގައި އެންމެ ގިނައިން އުޅޭ ބިދޭސީން ނިސްބަތްވާ ބަންގުލަދޭޝްއިން ރާއްޖެއަށް ލޭބަރުން ނުގެނެވޭ ގޮތް ހަދައިފަ އެވެ. ނަމަވެސް, މި ސަރުކާރުން ވަނީ ބަންގުލަދޭޝްއިން "އަންސްކިލްޑް" ލޭބަރުން ގެނެވޭ ގޮތަށް އަލުން އުސޫލު ބަދަލުކޮށްފަ އެވެ.
