މަޖިލިސް އިންތިހާބުގެ ވޯޓުލުން މިއަދު 8:00 ގައި ފެށިގެން މިހާރު ދަނީ ކުރިއަށެވެ.
މޫސުން ގޯސްވާނެ ކަމަށް ލަފާކޮށް އީސީއިން 5:30 އަށް ވޯޓުލާ ވަގުތު އިތުރުކޮށްފައިވާއިރު މިވަގުތު އޮތީ ގަދަ އަވި ދީފައެވެ. ވޯޓު ލާ މަރުކަޒުތަކުގައި ދިގު ކިއު ދަމާލާފައިވާއިރު، ރައީސް މުއިއްޒު މިހާރު ވަނީ މާފަންނު ދެކުނު ދާއިރާގެ ވޯޓުލުމަށް ތާޖުއްދީން ސްކޫލުގައި ބަހައްޓާފައިވާ ވޯޓު ފޮއްޓަށް މިއަދު ހެނދުނު 8:30 ގައި ވޯޓު ލައްވާފައެވެ.
މީގެއިތުރުން އަމީނިއްޔާ ސްކޫލުގައި ހުރި މައްޗައްގޯޅި މެދު ދާއިރާގެ ފޮއްޓަށް މެޑަމް ސާޖިދާވެސް ވަނީ މިހާރު ވޯޓު ލައްވާފައެވެ. އަދި ރައީސްގެ ދަރިކަނބަލުން ޔާސްމީން މުހައްމަދު މުއިއްޒު ވެސް ވަނީ ވޯޓުލައްވާފައެވެ.
މަޖިލިސް އިންތިހާބުގައި އަމިއްލަ ގޮތުން 130 ކެންޑިޑޭޓަކު ވާދަ ކުރާއިރު ހަތް ސިޔާސީ ޕާޓީން 238 ފަރާތެއް ވާދަ ކުރެއެވެ. އެއީ 326 ފިރިހެނުންނާއި 42 އަންހެނުންނެވެ.
ރައްޔިތުންގެ މަޖިލީހުގެ އިންތިހާބުގައި ރާއްޖެ އާއި ރާއްޖެއިން ބޭރުގައި 602 ވޯޓު ފޮށި ބެހެއްޓުމަށް ވަނީ ނިންމައިފައެވެ. މާލޭގައި 181 އަދި ހުޅުމާލޭގައި 51 ވޯޓު ފޮށި ބަހައްޓައެވެ.
އަދި ވިލިމާލޭގައި ނުވަ ވޯޓު ފޮށި ބަހައްޓާއިރު، އަތޮޅު ތެރޭގެ ރަށްތަކުގައި 319 ވޯޓު ފޮއްޓެއް ބަހައްޓައެވެ. އަދި ޖަލުތަކުގައި ފަސް ވޯޓު ފޮއްޓެއް ބަހަަައްޓާއިރު، ރިސޯޓްތަކުގައި 34 ވޯޓު ފޮއްޓެއް ބަހައްޓައެވެ. އޭގެ އިތުރުން ރާއްޖެއިން ބޭރުގައި ތިން ވޯޓު ފޮއްޓެއް ބަހައްޓައެވެ. ސިނާއި މަސައްކަތް ކުރާ އެއްވެސް ތަނެއްގައި މި އިންތިހާބުގައި ވޯޓު ފޮށި ބަހައްޓަފައެއް ނުވެއެވެ.
މަޖިލިސް އިންތިހާބުގައި ވޯޓުލެވޭ މީހުންގެ އަދަދު 284،663 އަށް އަރައެވެ.
