ކުރީގެ ރައީސް އަބްދުﷲ ޔާމީން ހައްޔަރު ކުރުމުން ކުރިއަށް ގެންދިޔަ އެއްވެސް މުޒާހަރާއެއްގައި އެމަނިކުފާނުގެ އަނބިކަބަލުން ފާތިމަތު އިބްރާހިމް އާއި ދަރިކަލުން ޒެއިން އަބްދުﷲ ބައިވެރިވެވަޑައިނުގެންނެވީ ކީއްވެތޯ އައްސަވާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ) ސުވާލު އުފައްދަވައިފިއެވެ.

ޕީއެންސީ/ޕީޕީއެމްގެ ލީޑާޝިޕްގެ ބޭފުޅުން މިއަދު ބޭއްވި ޕެނަލް ޑިސްކަޝަނެެއްގައި ވާހަކަ ދައްކަވަމުން އަދުރޭ ވަނީ، ޔާމީނުގެ އަރިހުގައި މިހާރު ތިއްބެވި ބޭފުޅުން އިހްލާސްތެރި ނޫން ކަމަށް ވިދާޅުވެފައެވެ. އެގޮތުން ކުރީގެ ނައިބު ރައީސް އަދި ޔާމީނުގެ އިސް ވަކީލު ޑރ. މުހައްމަދު ޖަމީލް އަހްމަދު އިހްލާސްތެރި ނޫން ކަމަށް ވިދާޅުވެ ފަހުން އަދުރޭ ވަނީ ޔާމީންގެ އަނބިކަނބަލުންނާއި ދަރިކަލުންނާ މެދު ބޮޑު ސުވާލެއް އުފައްދަވާފައެވެ.

އެގޮތުން ރައީސް ޔާމީން ޖަލުގައި ހުންނެވި ހުރިހާ ދުވަހު މެޑަމް ފާތުން އާއި ދަރިކަލުން ޒެއިން އެއްވެސް މުޒާހަރާއަަކަށް ވަޑައި ނުގަން ކަމަށާއި މިއީ ސުވާލު އުފައްދަން ޖެހޭ ކަމެއް ކަމަށް އަދުރޭ ވިދާޅުވިއެވެ.

މީގެ ކުރިން ސިޔާސީ އިސްވެރިން ހައްޔަރު ކުރި ފަހަރުތަކުގައި އާއިލާއިން މުޒާހަރާގައި ބައިވެރިވާ ކަން ހާމަކުރައްވަމުން އަދުރޭ ވިދާޅުވީ، ކުރީގެ ރައީސް މައުމޫން އަބްދުލްގައްޔޫމް ހައްޔަރު ކުރުމުން އެމަނިކުފާނުގެ އަނބިކަނބަލުން ނަސްރީނާ އިބްރާހިމް މުޒާހަރާއަށް ވަޑައިގެން ކަމަށެވެ. ހަމައެއާއެކު ޖޭޕީގެ ލީޑަރު ގާސިމް އިބްރާހިމް ހައްޔަރު ކުރުމުން އަނބިކަނބަލުން ކުރީގެ ޓްރާންސްޕޯޓް މިނިސްޓަރު އާއިޝަތު ނަހުލާ ވެސް ނިކުމެވަޑައިގެން ކަމަށް އަދުރޭ ވިދާޅުވިއެވެ.

މެޑަމް ފާތުންނާއި ޒެއިން މުޒާހަރާތަކަށް ވަޑައިނުގަން އިރު، މިހާރު ސަރުކާރުގައި ތިއްބެވި އިސް ބޭފުޅުންނަށް އެ ބޭބޭފުޅުންނަށް ފާޑުވިދާޅުވެވެން ނެތް ކަމަށް އަދުރޭ ވިދާޅުވިއެވެ. އޭރު މުޒާހަރާގައި ބައިވެރިވި އިސް ބޭފުޅުންގެ ތެރޭގައި އެ ޕެނަލް ޑިސްކަޝަންގައި ބައިވެރިވެވެވަޑައިގެން ތިއްބެވި ބޭފުޅުންނަށް އިޝާރާތްކުރައްވައި އަދުރޭ ވިދާޅުވީ، ރައީސް ޔާމީނަށް އިހުލާސްތެރިވި ބޭފުޅުން މި ތިބީ މިސަފުގައި ކަމަށެވެ.

ހަބަރު އަބްދުއްރަހީމް އަބްދުﷲ ޔާމީން ޕީޕީއެމް/ ޕީއެންސީ