ދައުރު ނިމޭއިރު ރާއްޖޭގައި ގެދޮރުގެ މައްސަލަ ހައްލުނުވާ ރައްޔިތަކު ނުހުންނާނެކަމަށް ރައީސް ޑރ. މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައިވަނީ މިހާރު ދެކުނުގެ ރަށްތަކަށް ކުރައްވަމުންގެންދަވާ ދަތުރުފުޅުގައި މިއަދު ގދ. ފަރެސްމާތޮޑާއަށް ވަޑައިން އެރަށު ރައްޔިތުންނާ ބައްދަލު ކުރައްވާ ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ. ރައީސް ވިދާޅުވީ، ރައީސް ވިއުދުވެފައިވާ ފަދައިން މި ފަސް އަހަރު ދުވަސް ނިމުމުގެ ކުރިން ރާއްޖޭގައި ގެދޮރުގެ މައްސަލަ ހައްލުނުވާ އެއްވެސް ރައްޔިތަކު ނުހުންނާނެ ކަމަށާއި އެ ޓާގެޓް ހާސިލުކުރައްވާނެ ކަމަށެވެ.
ރައީސް ވިދާޅުވީ ގެދޮރުވެރިކަމަކީ މި ސަރުކާރުގެ އެންމެ މުހިންމު އެއް ސިޔާސަތު ކަމަށާއި، ފަރެސްމާތޮޑާގެ ބިން ހިއްކައިގެން އެ ރަށުގެ ރައްޔިތުންނަށް އެ ފުރުސަތު ދެއްވާނެ ކަމަށެވެ. އެގޮތުން އެ ރަށުގެ ބިން ހިއްކުމަށް ލޯނު ފެސިލިޓީތައްވެސް މުޅި ރާއްޖެއަށް ފޯރުކޮށްދޭން މަސައްކަތްކުރަމުން ދާކަމަށެވެ.
މީގެއިތުރުން ރައީސް ވިދާޅުވީ މަގު ހެދުމުގެ މަސައްކަތްވެސް ރައީސް ވައުދު ވެފައިވާ ފަދައިން ކޮށްދެއްވާނެ ކަމަށާއި، އެއީ މެނިފެސްޓޯގައި ހިމަނާފައިވާ މުހިންމު ކަމެއް ކަމަށެވެ. މަޑަވެލީގެ މަގުތައް ތަރައްގީކޮށްދެއްވާނެ ކަމަށް ރައީސް ވިދާޅުވިއިރު، ރައީސް ވަނީ ސިޓީއެއްގައި ނަމަ ހުރިހާ މަގެއް ހަދާނެ ކަމަށާއި، ދެން ހުރި ރަށްތަކުގައި މުހިންމު ހުރިހާ ހިދުމަތްދޭ ތަންތަން ހުންނަ މަގުތައް، މި ފަސް އަހަރުގެ ތެރޭގައި ހަދައި ނިންމާނެ ކަމަށެވެ.
މިކަން ކުރުމަށްޓަކައި ބަޖެޓުގެ ތެރެއިން ޖާގަ ހޯދައިގެން އަދި އެހެނިހެން ފައިނޭންސިން ފެސިލިޓީޒްތައްވެސް ފަހިކުރަމުން ދާކަމަށް ރައީސް ވަނީ ވިދާޅުވެފައެވެ.
