މާދަމާއިން ފެށިގެން ދިވެހި ދިދަ ބައި ދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.
ރައީސް މިފަދައިން ނިންމަވާފައި ވަނީ ދެކުނު އެފްރިކާގެ ގައުމެއް ކަމަށްވާ ނެމީބިއާގެ ރައީސް ހާގޭ ގެންގޮބް، އަވަހާރަވުމާ ގުޅިގެން އެކަމުގެ ހިތާމައިގައެވެ.
އޭނާއަކީ 2015 ވަނަ އަހަރުން ފެށިގެން އަވަހާރަވުމާ ހަމައަށް ނެމީބިއާގެ ތިންވަނަ ރައީސްކަން ކުރެއްވި ބޭފުޅެކެވެ. ރައީސް ކަމުގެ އިތުރުންވެސް ހާގޭ ގެންގޮބް ވަނީ ސަރުކާރުގެ މަތީ މަގާމުތައް ފުރުއްވާފައެވެ.
އެގޮތުން 1990 ވަނަ އަހަރުން ފެށިގެން 2002 ވަނަ އަހަރާ ހަމައަށް ނެމީބިއާގެ ފުރަތަމަ ބޮޑުވަޒީރުކަން ކުރެއްވި ގެއިންގޮބް ވަނީ 2012 އިން 2015 އަށް ދެވަނަ ފަހަރަށް ބޮޑުވަޒީރުކަން ކުރައްވާފައެވެ.
އުމުރުން 82 އަހަރުގައި ހާގޭ ގެންގޮބް އަވަހާރަވެފައި ވަނީ ކެންސަރު ބައްޔަށް ފަރުވާ ހޯއްދަވަމުން ދަނިކޮށެވެ.
