އޮފީސްތަކުގެ ޓެލެޑްރާމާ މުބާރާތަށް ބްރޯޑްކާސްޓިން ޕާޓްނަރެއް ހޯދަން އިއުލާން ކޮށްފިއެވެ.
ނޭޝަނަލް ސެންޓާ ފޮ ދި އާޓްސް (އެންސީއޭ) އިން ކުރި އިއުލާނެއްގައި ބުނީ މިއަހަރުގެ މިމުބާރާތުގައި ބައިވެރިކުރާ ޑްރާމާތައް ބްރޮޑްކާސްޓް ކުރައްވަން ބޭނުންފުޅުވެލައްވާ ފަރާތްތަކަށް އެފުރުސަތު ހުޅުވާލެވިފައިވާކަމަށެވެ. ޑްރާމާ މުބާރާތް ގެނެސްދޭން ޝައުގުވެރިވާ ޗެނެލްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 12 ވަނަ ދުވަހާ ހަމައަށް ހުޅުވާލާފައިވާ ކަމަށާއި އެކަމާ ގުޅޭ އިތުރު މައުލޫމާތު 3310729 އަށް ގުޅުމުން ލިބިގެންދާނެ ކަމަށްވެސް އެންސީއޭއިން ވަނީ ބުނެފައެވެ. މި އަހަރު މި ޑްރާމާ މުބާރާތް ބޭއްވުމަށް ހަމަޖެހިފައިވަނީ ރަމަޟާން މަހާ ދިމާކޮށެވެ. މި މުބާރާތް މިއަހަރު ބާއްވަނީ ފަސް އަހަރު ދުވަހުގެ މުއްދަތެއް މެދުކެނޑުމަކަށްފަހުގައެވެ.
އެންސީއޭ އިން ބުނީ މި މުބާރާތް ބޭއްވުމުގެ މަގްސަދަކީ މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް ފަންނުވެރީންނަށް ހިތްވަރުދީ އަގުވަޒަންކޮށް އެކުވެރި ވާދަވެރި މާހައުލެއްގައި ފަންނުވެރިކަން ތަރައްގީކޮށް ދެމެހެއްޓުން ކަމަށެވެ. ޓެލެޑްރާމާގެ ތީމަކީ އެ އޮފީހެއް، މުއައްސަސާއެއް ނުވަތަ ކުންފުންޏެއްގެ މައިގަނޑު މަސައްކަތްތަކާ ގުޅުންހުރި އަދި އިޖުތިމާއީ މައްސަލައަކަށާއި އެއަށް ހައްލެއް ހޯދޭނެ ކަންކަން ކަމަށް ވެސް އެންސީއޭ އިން ވަނީ ބުނެފައެވެ. މި މުބާރާތުން އެންމެ މޮޅު ޑްރާމާއަށް 50،000 ރުފިޔާގެ ފައިސާގެ އިނާމް އެންސީއޭއިން ހުށަހަޅާފައިވާ އިރު، އެންމެ މޮޅު އަންހެން އަދި ފިރިހެން އެކްޓަރަށް 15،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ. އޮފީސްތަކުގެ ޓެލެޑްރާމާ މުބާރާތުގައި ބައިވެރިވެވޭނީ ސަރުކާރު އޮފީސްތަކާއި އަމިއްލަ މުވައްސަސާތަކުގެ އިތުރުން ސަރުކާރު ހިއްސާވާ ކުންފުނިތަކަށް އެކަންޏެވެ.
