އުރީދޫގެ 2024 ވަނަ އަހަރުގެ ކަލަންޑަރު ލޯންޗުކޮށްފިއެވެ.
ކަލަންޑަރު ލޯންޗު ކޮށްދެއްވީ މިއަދު އުރީދޫ ހެޑްކުއާޓާސް ގައި ބޭއްވި ހަފްލާއެއްގައި ދިވެހި ބަހާއި ތާރިހާއި ސަގާފަތާ ބެހޭ މިނިސްޓަރު އާދަމް ނަސީރު އިބްރާހީމެވެ. މިދިޔަ އަހަރެކޭ އެއްފަދައިން މި އަހަރުގެ ކަލަންޑަރުގައި ވެސް އުރީދޫއިން ވަނީ ތަފާތު ކަމެއް ހިމަނާފައެވެ. އެއީ ރާއްޖޭގެ އުތުރުން ދެކުނަށް ދުވާ ގޭމެކެވެ.
ކަލަންޑަރާއެކު ތަޢާރަފް ކޮށްފައިވާ "އަތޮޅު ދުވުން" ގޭމަކީ، ހުރިހާ އުމުރުފުރާއަކަށް ބައިވެރިވެވޭ ގޮތަށް ރާއްޖޭގައި ތައްޔާރުކުރި ފުރަތަމަ އެންޑްލަސް ރަނާ ޖޯންރާގެ ގޭމެވެ. އުރީދޫ މޯލްޑިވްސްގެ އެންމެ ފުރަތަމަ އިސްތިހާރު ކަމަށްވާ، "ހަސަނަށް ފޯނެއް"ގެ ދަތުރުގައި މިފަހަރު ރާއީ ދުވެފައި މިދަނީ ރާއްޖޭގެ އުތުރުން ދެކުނަށް ކަމަށްވާއިރު، ކޮންމެ މަހަކު ރާއްޖޭގެ އެއް ރަށް ނުވަތަ ލެވަލެއް އަންލޮކް ވެގެން ދާނެއެވެ.
މިގޭމުގައި 12 ލެވެލް ހިމެނޭއިރު، ކޮންމެ މަހަކު އާލެވެލެއްގައި އާ ރަށަކަށް ދަތުރުކުރެވޭނެއެވެ. އުރީދޫގެ 2024ގެ ކަލަންޑަރުގައި ސިއްރު އާޓްވޯކް ހިމަނާފައިވާއިރު، މި އާޓްވޯކް ގޭމްގެ ތެރެއިން ހޯދައިގެން ބޯނަސް ލެވެލްއެއް ކުޅުމުގެ ފުރުސަތު ލިބިގެންދާނެއެވެ. މިއަހަރުގެ އުރީދޫ ކަލަންޑަރު އަދި ގޭމް ތައްޔާރުކުރައްވާފައިވަނީ ލޫޕްކްރާފްޓްގެ ހުނަރުވެރި ޓިމުންނެވެ.
މި ގޭމްގެ ސަބަބުން އެކަކު އަނެކަކާއި އޮންނަ ގުޅުން ބަދަހިވެ، ގޭމެއްގެ ތެރެއިން ރާއްޖޭގެ ރައްތަށް ބަލާލެވި އިތުރު ރަށްތަކެއްގެ މައުލޫމާތު ފެތުރިގެންދާނެކަމަށް އުރީދޫއިން ބުނެއެވެ. އަދި މި ކަލަންޑަރާ ގުޅޭގޮތުން އުރީދޫ މޯލްޑިވްސްގެ މެނޭޖިންގް ޑިރެކްޓަރު އަދި ސީއީއޯ ހާލިދު އަލް ހަމާދީ ވިދާޅުވީ، މިއީ ޒުވާނުންނަށާއި ދިވެހިން ކުރިއެރުވުމަށް އަދި އީޖާދީ ޓެކްނޮލޮޖީ ކުރިއެރުވުމަށް އުރީދޫ މޯލްޑިވްސްއިން ދޭ އަހުމިއްޔަތުކަން ވަރުގަދަ ކުރުމުގެ ހެއްކެއް ކަމަށެވެ.
އުރީދޫ މިދިޔަ އަހަރުގެ ކަލަންޑަރު ވަނީ ދަނޑުވެރިކަމަށް ހާއްސަ ކޮށްފައެވެ. އެ ކަލަންޑަރަކީ ގަސް އިންދުމަށް ހިތްވަރުދީ، ރާއްޖޭގައި އާއްމުކޮށް އިންދާ އެކި ބާވަތްތަކުގެ ގަސްގަހުގައި އަޅާ މަލާ، އާންމުކޮށް ރާއްޖެއިން ފެންނަ މާމެލާމެލީގެ ފޮޓޯތައް ހިމަނައިގެން ތައްޔާރުކޮށްފައިވާ ކަލަންޑަރެކެވެ. ސްނެޕްޗެޓު މެދުވެރިކޮށް، އޭއާރު ފީޗާއިން ކަލަންޑަރުގެ ތްރީ ޑީ މަންޒަރު ފެންނައިރު އުރީދޫގެ އެ ކަލަންޑަރުގައި ޕެޝަންފްރުޓް، ކަރާ، މިރުސް އަދި އާއްމުކޮށް ފެންނަ އަސުރުމަލާއި، މަލިކުރުވާމަލާއި މަތަރެސްމާ ވަނީ ފީޗާކޮށްފައެވެ.
