ރައީސް ޑރ. މުހައްމަދު މުއިއްޒު، ކޮމިޝަނާ އޮފް ޕޮލިސްކަމަށް އެސިސްޓެންޓް ކޮމިޝަަނަރުގެ މަގާމުގައި ހުންނެވި އަލީ ޝުޖާއު އައްޔަން ކުރައްވައިފިއެވެ.
ކޮމިޝަނާ އޮފް ޕޮލިސް ޝުޖާއާށް މަގާމުގެ ފަތްކޮޅު އެރުވުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު ރައީސް އޮފީހުގައެވެ.
ޝުޖާއު އެންމެ ފަހުން ހުންނެވީ އެސިސްޓެންޓް ކޮމިޝަނާ އޮފް ޕޮލިސްގެ މަގާމުގައެވެ. ޕޮލިސް އެކަޑަމީގެ އިސްވެރިއެއްގެ ގޮތުގައި މަސައްކަތް ކުރެއްވުމާއި އަދި ފުލުހުންގެ ހިދުމަތުގައި ދިގު މުއްދަތެއް ޝުޖާއު ހޭދަކުރައްވާފައި ވެއެވެ.
ޝުޖާއު ވަނީ މެލޭޝިއާގެ އިންޓާނޭޝަނަލް އިސްލާމިކް ޔުނިވާސިޓީއިން މާސްޓާ އޮފް މެނޭޖްމަންޓް ހާސިލުކުރައްވާފައެވެ. އަދި ޝުޖާއުއަކީ އެމެރިކާގެ ޔުނިވާސިޓީ އޮފް ވާޖީނިއާ އެފިލިއޭޓްވާ އެފްބީއައި ނޭޝަނަލް އެކަޑަމީ ސެޝަން 277ގެ އެފްބީއައި ގުރެޖުއޭޓެއް ވެސް މެއެވެ.
ކޮމިޝަނާ އޮފް ޕޮލިސްގެ މަގާމަށް ކުރިމަތިލާން ހުޅުވާލި ފުރުސަތު އެ މަގާމަށް ކުރިމަތިލެއްވީ ޝުޖާއުގެ އިތުރުން އެސިސްޓެންޓް ކޮމިޝަނާ އިސްމާއިލް ނަވީންއެވެ. އެ 2 ބޭފުޅުންގެ ނަން ވެސް ހޯމް މިނިސްޓްރީއިން ވަނީ ފުލުހުންގެ ބޯޑަށް ފޮނުވާފައެވެ. އަދި ބޭފުޅުންގެ ނަން ދިރާސާ ކުރުމަށްފަހު ސީޕީގެ މަގާމަށް ޝުޖާއު އައްޔަން ކުރަން، ޕޮލިސް ބޯޑުން ވަނީ ހޯމް މިނިސްޓަރަށް ލަފާ އަރުވާފައެވެ.
އެ މަގާމަށް ކުރިމަތި ލެއްވެނީ ވެސް އެސިސްޓެންޓް ކޮމިޝަނަރު ރޭންކުން ފެށިގެން މަތީ ބޭފުޅުންނަށެވެ. ގާނޫނުގައިވާ ގޮތުން ޕޮލިސް ކޮމިޝަނަރުގެ މަގާމަށް ބޭފުޅަކު ކަނޑައަޅަނީ ޕޮލިސް ބޯޑުން ވަޒަންކޮށް، މިނިސްޓަރަށް ހުށަހަޅާ ނަންތަކުގެ ތެރެއިން، މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާއެވެ.
އެ މަގާމު އެންމެ ފަހުން ފުރުއްވާފައި ވަނީ މުހައްމަދު ހަމީދެވެ. އެ މަގާމު ހުސްވެފައި ވަނީ މިދިޔަ މަހުގެ 15 ވަނަ ދުވަހު ހަމީދު ރިޓަޔާ ކުރެއްވުމާ ގުޅިގެންނެވެެ. އެއާއެކު މިހާރު އެކްޓިން ކޮމިޝަނަރުގެ މަގާމުގައި ހުންނެވީ އެސިސްޓެންޓް ކޮމިޝަނަ އޮފް ޕޮލިސް ފަރުހާދު ފިކުރީ އެވެ.
