1 މާޗު 2024 ގައި ފެށުނު އެއާ އެމްބިއުލެންސްގެ ހިދުމަތުން މިހާތަނަށް 3000 އަށްވުރެ ގިނަ ބަލިމީހުން އުފުލާފައިވާކަމަށް ހެލްތް، ފެމިލީ އެންޑް ވެލްފެއާ މިނިސްޓަރު ގީލާ އަލީ ވިދާޅުވެއްޖެއެވެ.
މިނިސްޓަރު ގީލާ މިފަދައިން ވިދާޅުވެފައިވަނީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. އެގޮތުން މިނިސްޓަރު ވިދާޅުވީ މި ހިދުމަތް ފެށުނު ފަހުން މިހާތަނަށް 2336 ދަތުރު ކުރެވިފައިވާކަމަށާއި، އަދި 3025 ބަލި މީހުން އުފުލާފައިވާކަމަށެވެ.
މި ހިދުމަތުމައި ފުރަތަމަ ބޭނުންކުރަން ފަށާފައިވަނީ ޑޭޝް-8 މަރުކާގެ ބޯޓެއް އެކަނި ނަމަވެސް 2024 ވަނަ އަހަރުގެ އަހަރުގެ މާޗު 15 އިން ފެށިގެން މި ހިދުމަތުގައި ޑީއެވްސީ-6 ޓްވިން އޮޓާގެ ސީ ޕްލޭނެއްވެސް ބޭނުންކުރަން ފަށާފައެވެ.
ސަރުކާރުން އެއާ އެމްބިއުލާންސްގެ ހިދުމަތް ފޯރުކޮށްދެނީ އައިލެންޑް އޭވިއޭޝަން ކުންފުންޏާ ގުޅިގެންނެވެ.
މީގެއިތުރުން ގީލާ ވިދާޅުވީ އެމްބިއުލޭޓަރީ ހިދުމަތް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން ރާއްޖޭގެ 87 ރަށަކަށް އެމްބިއުލެންސް ފޮނުވިފައިވާކަމަށެވެ. އަދި 10 ޕެރެމެޑިކް އެމްބިއުލެންސް ހޯދުމުގެ މަސައްކަތް މިހާރު ކުރަމުންދާކަމަށް ވެސް ގީލާ ވަނީ ވިދާޅުވެފައެވެ.
ގީލާ އިތުރަށް ވިދާޅުވީ ސިއްހީ ދާއިރާއަށް ހާއްސަކޮށްގެން މި ސަރުކާރުން 478 ވައުދެއް ވެފައިވާކަމަށާއި، އޭގެތެރެއިން 244 ވައުދެއް މިހާރު ފުއްދާފައިވާކަމަށެވެ.
އެގޮތުން ހޮސްޕިޓަލް މަޝްރޫއުތަކުގެ ތެރެއިން 40 އާ ހޮސްޕިޓަލުގެ މަޝްރޫއާ 22 އާ ސިއްހީ މަރުކަޒެއް ގާއިމުކުރުމުގެ މަސައްކަތް ކުރެވެމުންދާކަމަށް ގީލާ ވަނީ ފާހަގަކުރައްވާފައެވެ.
