މިއަހަރު ބާއްވާ 'އުރީދޫ ފަން ރަން މިއުޒިކް ފެސްޓިވަލް'ގައި ވެސް އެ ކުންފުނީގެ ބްރޭންޑް އެމްބެސަޑަރު ހަބޭސް ބޮޑުބެރު ގުރޫޕު އަދި ޑިޓިއުންގެ އިތުރުން ރާއްޖޭގެ މަޝްހޫރު ފަންނާނުންގެ ހުނަރު ފެނިގެންދާނެކަމަށް އުރީދޫ އިން ބުނެފިއެވެ.
އުރީދޫ އިން ބުނީ ޑިސެމްބަރު 22، 2023 ވާ ހުކުރު ދުވަހުގެ ރޭ 20:00 ގައި ފެށުމަށް ހަމަޖެހިފައިވާ މި މިއުޒިކް ފެސްޓިވަލް ގައި އުރީދޫ ބްރޭންޑް އެމްބެސަޑަރު ހަބޭސް ބޮޑުބެރު އަދި ޑިޓިއުން ގެ އިތުރުން މީރާ، ޓްރެފިކް ޖޭމް، ޒަކިއްޓެ އަދި ޑީޖޭ ދީދު ފެނިގެންދާނެކަމަށެވެ.
އުރީދޫ މިއުޒިކް ފެސްޓިވަލކީ ކޮންމެ އަހަރަކު ވެސް ރާއްޖޭގަ ބޭއްވާ އެންމެ ބޮޑު އަދި އެންމެ އުފާވެރި ދުވުން – އުރީދޫ ފަން ރަން ނިންމާލުމަށް ފަހު އޮންނަ މިއުޒިކް ފެސްޓިވަލް އެކެވެ. ކޮންމެ އަހަރަކު ވެސް މަގުބޫލު ފަންނާނުން ފެނިގެން ދާ މި މިއުޒިކް ފެސްޓިވަލް އަކީ ގިނަ އަދަދެއްގެ ޒުވާނުން އާއިލާ އާއި ރައްޓެހިންނާއެކު އުފާވެރި ވަގުތު ކޮޅެއް ހޭދަކުރާ ހަރަކާތަކަށް ވާއިރު މި އަހަރުގެ ފެސްޓިވަލްވެސް އިތުރަށް ފޯރިގަދަކުރުމަށް އުރީދޫ އިން އަންނަނީ ގިނަ މަސައްކަތްތަކެއް ކުރަމުންނެވެ.
އުރީދޫ ފަން ރަން ގެ ހަރަކާތްތައް ހުކުރު ދުވަހު ހެދުނު 8:30 ގައި އުރީދޫ ޑްރޯން ރޭސް އިން ފެށިގެން ދާއިރު ހަވީރު 3:30 ގައި ރަން ގެ ހަރަކާތްތައް ކުރިއަށް ދާނެއެވެ.
އުރީދޫ އިން ވަނީ 'އުރީދޫ ފަން ރަން 2023' ގެ ހަރަކާތްތަކުގައި ބައިވެރިވެ އަދި ކުޅިވަރު ބަލާލުމަށް ހުޅުމާލެ ސެންޓްރަލް ޕާކަށް އެންމެހައި ފަރާތްތަކަށް ދައުވަތު އަރުވާފައެވެ.
