ރައްޔިތުންގެ މަޖިލީހުގެ އިންތިހާބުގައި ޕްރޮގްރެސިވް ކޮންގްރެސް ކޯލިޝަނުގެ ޓިކެޓުގައި ވާދަކުރުމަށް ޝައުގުވެރިވާ ޕީޕީއެމް އަދި ޕީއެންސީގެ މެންބަރުންނަށް އެ ކޯލިޝްނުގެ ޕްރައިމަރީގައި ވާދަކުރުމުގެ ފުރުސަތު ހުޅުވާލައިފިއެެވެ.
ޕީއެންސީ އިން ބުނީ ޑިސެމްބަރު 10 ވަނަ ދުވަހުގެ ނިޔަލަށް ޕީއެންސީ އަދި ޕީޕީއެމް ގައި ރަޖިސްޓްރީވެފައިވާ އަދި ޕާޓީގެ ފަރާތުން އިންތިހާބުގައި ވާދަނުކުރެވޭ ގޮތަށް ފިޔަވަޅު އަޅާފައިވާ މެންބަރުން ފިޔަވައި، އެހެން މެންބަރުންނަށް އިންތިހާބުގައި ވާދަކުރެވޭނެކަމަށެވެ.
މީގެ އިތުރުން މި އިންތިހާބުގައި ވާދަކުރާ ކެންޑިޑޭޓުންގެ ޝަރުތުތަކުގެ ތެރޭގައި
1- އަބުރުވެރި ނަޒާހަތްތެރި ފަރާތަކަށްވުން
2- މަޖިލީހާ ހާއްސަ މަޖިލީހުގެ ތަޖުރިބާ ލިބިފައިވާ މިންވަރު
3- ގާނޫނުތަކާ ގާނޫނު އަސާސީއަށް ފަރިތަ މިންވަރު
4- ޕާޓީއަށް ހިދުމަތްކޮށްފައިވާ މިންވަރު
ޕީއެންސީ އިން ވަނީ އިންތިހާބުގައި ވާދަކުރުމަށް ޝައުގުވެރިވާ ފަރާތްތަކުން ޑިސެމްބަރު 11 ވާ ހޯމަ ދުވަހު 18:00 ގެ ކުރިން ފޯމު ހުށަހެޅުމަށް އެދިފައެވެ. ޕްރޮގްރެސިވް ކޯލިޝަނުގެ ފަރާތުން އިންތިހާބުގައި ވާދަކުރުމަށް ޝައުގުވެރިވާ ޕީޕީއެމް އަދި ޕީއެންސީގެ މެންބަރުންނަށް ކޯލިޝަން ކޮމިޓީއިން އެ ފުރުސަތު ހުޅުވާލާއިރު އެމްޑީއޭ އަދި އެމްއެންޕީ އާއި އެކު އެއްބަސްވާ ގޮތެއްގެ މަތިން ކޯލިޝަނުގެ ޕްރައިމަރީގައި ވާދަކުރެވޭނެއެވެ.
ޕީއެންސީ އިން ބުނީ ކޯލިޝަންގެ ފަރާތުން ވާދަކުރާ ކެންޑިޑޭޓުން ކަނޑައެޅުމުގެ އިންތިޒާމު ހަމަޖެއްސުމުގެ މަސައްކަތްކުރިއަށް ގެންދާނީ އެ ކޯލިޝަންގެ ލީޑާޝީޕުންކަމަށެވެ. އަދި ކެންޑިޑޭޓުން ހޮވުމަށް ޕްރައިމަރީއެއް ބާއްވަންޖެހިއްޖެ ނަމަ ޕްރައިމަރީގެ ކަންތައްތައް ހަމަޖައްސާނީ ކޯލިޝަންގެ ލީޑާޝިޕުން ކަނޑައަޅާ ކޮމިޓީއަކުން ކަމަށެވެ.
ޕީއެންސީ އިން ބުނީ މި އިންތިހާބުގައި ވާދަކުރުމަށް މިހާގެ ވަނަވަރާ، ޕްރައިމަރީ ބޭއްވުމުގެ އެއް ހަފްތާކުރިން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަނުން ހޯދާފައިވާ މެންބަރުންގެ ކުށުގެ ރެކޯޑު ހުށަހަޅަންޖެހޭނެ ކަަމަށެވެ. އަދި އެ ކޮލިޝަނުގެ ޕްރައިމަރީގައި ވާދަކޮށް އިންތިހާބު ކާމިޔާބު ނުކުރެވުނު ހާލަތެއްގައިވެސް އެ ފުރުސަތު ލިބޭ ކެންޑިޑޭޓަކަށް އިންތިހާބުގައި ތާއިދުކޮށް އަމަލީ ގޮތުން މަސައްކަތްކުރުމާއެކު އިންތިހާބުގައި އަމިއްލަ ގޮތުން ވާދަނުކުރާނެކަމުގެ އިގުރާރު ހުށަހަޅަންޖެހެއެވެ.
މި އިންތިހަބުގައި ޕްރައިމަރީގައި ވާދަކުރާ ކެންޑިޑޭޓުންގެ ނަންބަރު ތަރުތީބުކުރާނީ ފޯމު ހުށަހަޅާ ތަރުތީބުންނެވެ.
