އެކި މައްސަލަ ތަކުގައި ފުލުހުންގެ ބެލުމުގެ ދަށަށް ގެނެސްފައިވާ ގިނަ އަދަދެއްގެ ބަނގުރަލާއި ބިޔަރު ނައްތާލައިފިއެވެ.
ފުލުހުން ބުނީ މި ތަކެއްޗަކީ އެ އިދާރާއަށް ހުށަހަޅާފައިވާ ބަނގުރަލުގެ މައްސަލަތަކުގެ ތެރެއިން ފައިލުކުރުމަށް ނިންމާފައިވާ މައްސަލަތަކުގައި ހިމެނޭ ބަނގުރާ ކަމަށެވެ.
މީގެ އިތުރުންވެސް ޑްރަގް އެންފޯސްމަންޓާއި، ޓޫރިސްޓު ޕޮލިސް އަދި ހުޅުމާލެ ޕޮލިސް ސްޓޭޝަނުގެ ބެލުމުގެ ދަށަށް ތުހުމަތުކުރެވޭ ފަރާތެއް ނެތްގޮތަށް އެކި މައްސަލަތަކުގައި ގެނެސްފައިވާ ބަނގުރާ ވެސް ނައްތާލާފައިިވާ ކަމަށް ފުލުހުން ބުނެއެވެ.
މިތަކެތި ނައްތާލާފައި ވަނީ އިއްޔެގެ ވަގުތެއްގައި ދޫނިދޫގައެވެ. އެގޮތުން، ބްރޭންޑެޑް ފުޅީގެ 298 ފުޅި، 200 ޕެޓް ފުޅި އަދި 936 ބިޔަރު ދަޅު ނައްތާލާފައިވާއިރު އެހެނިހެން ތަކެތީގެ ގޮތުގައި ހިމެނޭ 12 އައިޓަމްވެސް ވަނީ ނައްތާލާފައެވެ. އެހެނިހެން ތަކެތީގެ ތެރޭގައި ކޮތަޅު، ނޫސްކަރުދާސް، ކަރުދާސް ފޮށިގަނޑު އަދި ދަބަސް ފަދަ ތަކެތި ހިމެނޭ ކަމަށް ފުލުހުން ބުނެފައި ވެއެވެ.
އެގޮތުން މި ތަކެތި ނައްތާލުން ކުރިއަށް ގެންގޮސްފައި ވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރާގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން ކަމަށް ފުލުހުން މައުލޫމާތު ދީފައި ވެއެވެ.
މިދިޔަ ސެޕްޓެމްބަރު މަހުވެސް ވަނީ ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރާ ނައްތާލާފައެވެ. އެގޮތުން އެ ފަހަރުވެސް ބްރޭންޑެޑް 4100 ފުޅި، 743 ޕެޓް ފުޅި، 4421 ދަޅު އަދި 19 ޕެކެޓް ބަނގުރާ ހިމެނޭއިރު އެހެނިހެން ތަކެތީގެ ގޮތުގައި 79 އައިޓަމްވެސް ނައްތާލާފައި ވެއެވެ.
