ރާއްޖެއިން ފޯރުކޮށްދިން ދެ އެމްބިއުލާންސް ގާޒާގެ ތެރޭގައި ހަރަކާތްތެރި ވަމުންދާ ކަމަށް އިންޓަނޭޝަނަލް އެއިޑް ކެމްޕެއިން (އައިއޭސީ) އިން ބުނެފިއެވެ.
އައިއޭސީން ބުނީ، 2021 އަހަރުގައި ދިވެހި ރައްޔިތުންގެ އެހީގައި ފޯރުކޮށްދިން ދެ އެމްބިއުލާންސް މިއަދުވެސް ގާޒާގެ ތެރޭގައި ހަރަކާތްތެރި ވަމުންދާ ކަމަށެވެ. އަދި ގާޒާގެ ރައްޔިތުން މިއަދު އެންމެ ބިކަ ހާލުގައި ޖެހެމުންދާ ވަގުތު, ދިވެހިންގެ ފަރާތުން ފޯރުކޮށްދިން އެފަދަ އެހީއެއް [އެމްބިއުލާންސް] އެގޮތަށް ހަރަކާތްތެރި ވުމަކީ 'ހިތަށް ކޮންމެސް ވަރެއްގެ ހިތްހަމަ ޖެހުމެއް' ލިބޭ ކަމެއް ކަމަށް އައިއޭސީން ބުނެއެވެ.
ޔަހޫދީންގެ ހަމަލާތަކަށް ބިރު ނުގަންނާނެ ކަމަށާއި އެހީ ފޯރުކޮށްދިނުން އެއްވެސް ގޮތަކަށް މަޑު ނުޖެހޭނެ ކަމަށް އައިއޭސީއިން އަންނަނީ ތަކުރާރުކޮށް ބުނަމުންނެވެ. ފަލަސްތީނު މިނިވަން ވަންދެން ޔަހޫދީންގެ ލާއިންސާނިއްޔަތުގެ ވާހަކަ ދައްކަންޖެހޭ ކަމަށް ވެސް އައިއޭސީ އިން އަންނަނީ ބުނަމުންނެވެ.
އައިއޭސީ އަކީ ރާއްޖެއިން ބޭރުގައި ގުދުރަތީ ކާރިސާތަކުގެ އިތުރުން އެހެނިހެން ގޮތްގޮތުން ހާލުގައި ޖެހޭ އެކި ގައުމު ތަކުގެ މީހުންނަށް މީގެ ކުރިންވެސް އެހީތެރިކަން ފޯރުކޮށްދެމުން އަންނަ ޖަމްއިއްޔާއެވެ. އަދި މި ޖަމްއިއްޔާގެ އެންމެ ބޮޑު އެއް އަމާޒަކީ އެންމެނަށްވެސް ދެމެހެއްޓެނިވި ރަނގަޅު ދިރިއުޅުމެއް ފޯރުކޮށް ދިނުމެވެ. އަދި މި އެހީތެރިކަމުން ލިބޭ ފައިސާއިން 12 ޕަސެންޓު، ކެމްޕެއިން ހިންގައި ބެލެހެއްޓުމާއި ދެމެެހެއްޓުމާއި އިދާރީ ހިންގުމާއި ތަރައްގީއަށް ނަގާނެ ކަމަށް އޭއައިސީން ވަނީ ބުނެފައެވެ.
ރޭ އިޒްރޭލުން ގާޒާގެ އުތުރުން ކަރަންޓް ކަނޑާލައި މުޅި ގާޒާއިން މުވާސަލީ ހިދުމަތް ކަނޑާލި ވަގުތު ގާޒާގެ އެކި ހިސާބުގައި ހަރަކާތްތެރިވާ އައިއޭސީގެ އެޖެންޓުންނާވެސް ގުޅުން ކެނޑުނު ކަމަށް އެޖަމާއަތުން ބުންޏެވެ. އަދި މުވާސަލަތީ ހިދުމަތް ލިބިފައި ނުވާ އިރު ގުޅުން އަލުން ގާއިމު ކުރެވުނު ކަމުގެ މައުލޫމާތެއް ލިބިފައެއް ނުވެއެވެ.
ރެއަކީ މި ހަނގުރާމަ ފެށިފަހުން ޔަހޫދީ އިޒްރޭލުން އެންމެ ވަރުގަދަ ހަމަލާތައް ދިން ރެއެވެ. ހުއްޓުމެއް ނެތި 4 ގަޑިއިރު ވާންދެން މިނެޓްކު ބޮމެއް މިނެޓަކު ބޮމެއް އަޅަމުން ދިޔަ އިރު، ގާޒާ އަނދާ މަންޒަރު ނޫނީ ކަނު އަނދިރީގައި ނުފެނެއެވެ.
ރޭގެ ހަމަލާތަކުގައި ޝަހީދުވީ ކިތައް މީހުންކަން އަދި ސާފުނުވާ އިރު އެ އަދަދުތައް ނުލައި މިހާތަނަށް 7300 އަށް ވުރެ ގިނަ މީހުން ވަނީ މިދުނިޔެ ދޫކޮށްފައެވެ. އަދި އަނިޔާވެފައިވާ މީހުންގެ އަދަދު 18000 އަށް ވުރެ މައްޗަށް އަރާފައެވެ.
