ސަރުކާރުން 3 ބިލއިަން ރުފިޔާގެ ލޯނެއް އިންޑިއާއިން ނަގަން މަސައްކަތް ނުުކުރާ ކަމަށާއި އެ ފަދަ މަޝްވަރާއެއް ވެސް ނުކުރާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވެފައި މިވަނީ، "ދިޔަރެސް" ކިޔާ ނޫހެއްގައި ޖަހާފައިވާ ހަބަރަކާ ގުޅިގެންނެވެ. އަމީރު ވިދާޅުވީ، ސަރުކާރުން 3 ބިލިއަން ރުފިޔާގެ ލޯނެއް އިންޑިއާއިން ނަގަން ހުށަހަޅާފައިވާ ކަމަށް ބުނެ ލިޔެފައިވާ ހަބަރަކީ ކަނޑައެޅިގެން ދޮގު ހަބަރެއް ކަމަށާއި އެފަދަ އެއްވެސް މަޝްވަރާއެއް އެއްވެސް ފަރާތަކާއެކު ކުރިއަށް ނުގެންދާ ކަމަށެވެ.
ދިޔަރެހުގައި، ލިޔެފައި އޮތީ، މިއަދު އަމީރާއި އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރަން ބައްދަލުކުރެއްވި ކަމަށާއި، އެ ބައްދަލުވުމުގައި އެބޭފުޅުން މައިގަނޑު ގޮތެއްގައި މަޝްވަރާކުރީ ރިޔާސީ އިންތިހާބުގެ ދެވަނަ ބުރުގެ ވޯޓުލުމުގެ ކުރިން އިންޑިއާއިން ދަރަންޏަށް 3 ބިލިއަން ރުފިޔާ ނެގުމާ ގުޅޭ ގޮތުން ކަމަށެވެ.
އެ ފައިސާ ނެގުމަށް ސަރުކާރުން ހުށަހަޅާފައި ވަނީ ޓްރެޝަރީ ބޮންޑު، ސްޓޭޓް ބޭންކް އޮފް އިންޑިއާ (އެސްބީއައި) އަށް ވިއްކައިގެން ކަމަށް އެ ނޫހުގައި ބުނެފައިވާ އިރު، 194 މިލިއަން އެމެރިކާ ޑޮލަރުގެ ބޮންޑު އެސްބީއައި މެދުވެރިކޮށް ހަމަޖައްސައި ދިނުމަށް ސަރުކާރުން އެދިފައި ވަނީ ރިޔާސީ އިންތިހާބުގެ ދެވަނަ ބުރުގެ ވޯޓުލުމުގެ ކުރިން ހަރަދު ކުރުމަށް ކަމުގައި ވެސް ބުނެފައި ވެއެވެ.
ރިޔާސީ އިންތިހާބު ގާތްވެ ސިޔާސީ މަސްރަހު ހަލަބޮލިވެގެން އައި ހިސާބުން ފެށިގެން މިއަދާ ހަމައަށް ބައެއް ނޫސްތަކުން ދޮގު ހަބަރު ފަތުރާ ކަމަށް ސަރުކާރުގެ މުއައްސަސާތަކުން ފާހަގަ ކުރެއެވެ. އެގޮތުން އާންމުކޮށް ދޮގު ހަބަރު ފަތުރާ ކަމަށް ލޭބަލް ކުރާ އެއް ނޫހަކީ ދިޔަރެސް ކަން ފާހަގަ ކުރެވެއެވެ.
