މި އަހަރުގެ މިހާތަނަށް ރާއްޖެއަށް 1.2 މިލިއަން ފަތުރުވެރިން ޒިޔާރަތް ކޮށްފިއެވެ.
ޓޫރިޒަމް މިނިސްޓްރީން އާންމު ކުރި ތަފާސް ހިސާބުތައް ދައްކާ ގޮތުން މި މަހުގެ 7 ވަނަ ދުވަހުގެ ނިޔަލަށް ޖުމްލަ 1،254،252 ޓޫރިސްޓުން ވަނީ ރާއްޖެ އައިސްފައެވެ. އެއީ ދުވާލެއްގެ މައްޗަށް ބަލާނަމަ އެވްރެޖުކޮށް ދުވާލަކު 5,037 ފަތުރުވެރިން ރާއްޖެ ޒިޔާރަތް ކުރެއެވެ. އަދި އެވްރެޖުކޮށް 7 ދުވަހަށް ވުރެ ދިގު މުއްދަތަކަށް އެމީހުން ރާއްޖޭގައި ހޭދަ ކުރެއެވެ.
މިދިޔަ އަހަރުގެ މި މުއްދަތާ އަޅާ ބަލާއިރު މިއީ 14 ޕަސެންޓްގެ އިތުރުވުމެކެވެ. 2022 ވަނަ އަހަރުގެ މި މުއްދަތަށް ރާއްޖެ އައިސްފައި ވަނީ 1،100،620 ފަތުރުވެރިންނެވެ. އަދި ޖުމްލަ އެ އަހަރު 1.6 މިލިއަނަށްވުރެ ގިނަ ފަތުރުވެރިން ރާއްޖެ ވަނީ ޒިޔާރަތް ކޮށްފައެވެ.
ތަފާސް ހިސާބުތައް ދައްކާ ގޮތުން މި އަހަރު އެންމެ ގިނަ ފަތުރުވެރިން އައި ގައުމުތަކުގެ ލިސްޓުގެ ކުރީގައި އޮތީ ރަޝިއާ އެވެ. ދެވަނައަށް އިންޑިއާ އަދި ލިސްޓުގެ ތިންވަނައިގައި އޮތީ ޗައިނާއެވެ. ރަޝިޔާއިން ޖުމްލަ 147،187 ފަތުރުވެރިން ރާއްޖެ އައިސްފައިވާއިރު އިންޑިއާއިން އައިސްފައި ވަނީ 137،104 ފަތުރުވެރިންނެވެ. އަދި ޗައިނާއިން 124،549 ފަތުރުވެރިން ރާއްޖެ އައިސްފައިވެއެވެ.
މިއަހަރާ ހިލާފަށް 2022 ވަނަ އަހަރު ލިސްޓުގެ އެންމެ ކުރީގައި އޮތީ އަވަށްޓެރި އިންޑިއާއެވެ. ރަޝިއާ ދެވަނައަށް އޮތް އިރު ތިންވަނައިގައި އޮތީ ޔުނައިޓެޑް ކިންގްޑޮމް އެވެ.
ރާއްޖެއާ ދެމެދު 30 އެއާލައިނަކުން ފްލައިޓްތައް އޮޕަރޭޓް ކުރާއިރު ސަރުކާރުގެ މިއަހަރުގެ އަމާޒަކީ 1.9 މިލިއަން ފަތުރުވެރިން ގެނައުމެވެ. އަދި މިވަގުތަށް ބަލާނަމަ އަމާޒުގެ 65 ޕަސެންޓް މި ވަނީ ހާސިލް ކުރެވިފައެވެ.
