ސަރުކާރުގެ އިޖުތިމާއީ ބޯހިޔާވަހިކަމުގެ ތެރެއިން އަޅާފައިވާ ފްލެޓްތަކުގެ ކުލި ބޮޑުކޮށްގެން އެ ކުލި ނުދެއްދިގެން ޖޫރިމަނާކޮށް ދައްކަން ޖެހިފައިވާ ޖޫރިމަނާ ފައިސާ މައާފު ކޮށްދެއްވަން އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވައުދު ވެވަޑައިގެންފިއެވެ.
އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގެ ކެމްޕެއިނަށް ފުވައްމުލަކު ސިޓީ އަށް ވަޑައިގެން ބޭއްވި ޖަލްސާގައި މުއިއްޒު ވިދާޅުވީ، ސޯޝަލް ހައުސިންގެ ތެރެއިން ކުލި ނުދައްކައިގެން ކޮށްފައި ވާ ހުރިހާ ޖޫރިމަނާތަކަކީ އެއްވެސް އިންސާފަކުން ކޮށްފައިވާ ޖޫރިމަނާތަކެއް ނޫން ކަމަށެވެ.
މުއިއްޒު ވިދާޅުވީ، ޖޫރިމަނާ ކުރަން ޖެހޭނީ، ރައްޔިތުންނަށް ތަހައްމަލު ކުރެވޭ މިންވަރުގެ ކުއްޔެއް ދައްކަން ޖެހޭނަމަ ކަމަށެވެ.
މުއިއްޒު ވިދާޅުވި ގޮތުގައި، އޭނާގެ އަމާޒަކީ ޔާމީން ރާއްޖެއަށް ގެނެސްދެއްވި ތަރައްގީ އިޔާދަކޮށްދިނުމެވެ. ރައްޔިތުން ތިބީ އެ ސްޕީޑްގެ ތަރައްގީ ބޭނުންވެފައި ކަމަށާއއި މި ސަރުކާރުގެ ސްޕީޑްއާ މެދު މާޔޫސްވެފައި ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިޔާ މަޝްރޫއު ފެށީ ވަރަށް ހަރުދަނާ ޕްލޭނަކާ އެކު ގިނަ ކުންފުނިތަކަށް ފްލެޓް ލިބޭނެ ގޮތަށް ކަމަށެވެ. ނަމަވެސް ބައެއް ކުންފުނިތަކުގެ ފްލެޓްތަކުގެ މަސައްކަތް ނުފެށި، އެ މަޝްރޫއު މި ސަރުކާރުން ވުޖޫދުން ގެއްލުވާލާފައިވާ ކަމަށް މުއިއްޒު ފާހަގަ ކުރެއްވިއެެވެ.
މުއިއްޒު ވަނީ ޕީއެސްއެމް އަދި އެމްއެންޔޫގެ ފްލެޓްތައް އަލުން ގެނެސްދެއްވާ، މުވައްޒަފުން ގެދޮރުވެރި ކުރުވާނެ ކަމުގެ ޔަގީންކަން ދެއްވާފައެވެ. މީގެ އިތުރުން މުއިއްޒު ވަނީ ސިފައިންނާއި ފުލުހުންގެ ނުނިމި ހުރި ފްލެޓް މަޝްރޫއު ނިންމާނެ ކަމަށާއި އޭގެ އިތުރުން ވެސް ސިފައިންނާއި ފުލުހުންނަށް އަމާޒުކޮށް ހައުސިން މަޝްރޫއު ހިންގާނެ ކަމަށް ވިދާޅުވެފައެވެ.
ގެދޮރު އެޅޭނެ ގޮތްނެތް މީހުނަށް އެހީނުވެ ފުލެޓުއަޅައިދީފައި ތިބިމީހުނަށް ކުލި މަޢާފުކޮށްދިނީމައި އެ ވެވެނީ ރައްޔިތުންގެ ފައިސާއަށް ޚިޔާނާތް އެއަރައިގަނެވެނީ ރައްޔިތުންގެ ބައެއްގެ ހައްޤުތަކަށް
ޖޫރިމަނާޔައްއަރަނީ މަހަކައް09ރުފިޔާ